Astana men Beıjiń arasynda tikeleı áýe reısteri qaıta ashylady

ASTANA. QazAqparat - Azamattyq avıatsııa komıteti Qytaı Halyq Respýblıkasynyń avıatsııalyq bılik organdarymen birlesip, halyqaralyq áýe qatynasyn odan ári qalpyna keltirý jumysy sheńberinde Qazaqstan men Qytaı astanalary arasynda turaqty reısterdi qaıta ashý máselesin pysyqtady, dep habarlaıdy QazAqparat.

25 naýryzdan bastap «Eır Astana» áýekompanııasy Astana – Beıjiń baǵyty boıynsha aptasyna 3 reıs jıiligimen (dúısenbi, sársenbi, senbi) ushýdy qaıta bastaýdy josparlap otyr.

Reıster A-321 LR tıpti áýe kemelerinde oryndalady.

Sonymen qatar, 13 aqpannan bastap «Eır Astana» áýekompanııasy Almaty jáne Beıjiń qalalary arasyndaǵy reısterdi 1 reısten (dúısenbi) aptasyna 5 reıske deıin (dúısenbi, seısenbi, beısenbi, juma, jeksenbi) birtindep ulǵaıtýdy josparlap otyr.

Kóktemgi-jazǵy navıgatsııa kezeńde aptasyna 5-ten 7 reıske deıin kezeń-kezeńimen odan ári ulǵaıtady.

Reıs A-321 tıpti áýe kemelerinde oryndalady.

Qazaqstan men Qytaı arasyndaǵy áýe reısteriniń ulǵaıýy eki dos el arasyndaǵy saýda-ekonomıkalyq, ınvestıtsııalyq, týrıstik jáne mádenı-iskerlik yntymaqtastyqty damytýdy jedeldetýge múmkindik beredi.

Sondaı-aq QHR azamattary úshin engizilgen 14 kúndik vızasyz rejımdi tolyqqandy paıdalanýǵa yqpal etedi.