Astana men Ashhabad óńirlik turaqtylyqty nyǵaıtýǵa zor úles qosady – Murat Nurtileý
Murat Nurtileý sapar aıasynda Túrikmenstan Mınıstrler kabıneti tóraǵasynyń orynbasary –Syrtqy ister mınıstri Rashıd Meredovpen shaǵyn, odan keıin keńeıtilgen quramda kelissóz ótkizip, eki eldiń arasyndaǵy barlyq salaǵa qatysty máselelerdi talqyǵa saldy.
«Túrikmenstan biz úshin mańyzdy strategııalyq seriktes, óte jaqyn baýyrlas el. Bizdi san ǵasyrlyq dostyq dánekeri, tatý kórshilik dástúri men birtutas tarıhı tamyrlastyq baılanystyryp tur. Osy aıda elderimizdiń arasyndaǵy dıplomatııalyq qarym-qatynastyń ornaǵanyna 31 jyl toldy. Shırek ǵasyrdan astam ýaqyttyń ishinde biz barlyq baǵytta aıtarlyqtaı tabysqa qol jetkizdik. Salmaqty sharttyq-quqyqtyq baza qalyptasyp, qurlyq pen teńizdegi shekaramyzdy rásimdeý tolyǵymen aıaqtaldy», – dep atap ótti Qazaqstan Syrtqy ister mınıstri keńeıtilgen quramdaǵy kelissóz barysynda.
M.Nurtileýdiń atap ótýinshe, ótken jyly eki eldiń arasynda rásimdelgen 2022-2024 jyldarǵa arnalǵan ekijaqty yntymaqtastyq jónindegi keshendi jospar ret-retimen júzege asyrylyp keledi. Ekonomıkalyq, ǵylymı-tehnıkalyq jáne mádenı yntymaqtastyq jónindegi úkimetaralyq qazaq-túrikmen komıssııasynyń jumysy da oń órbı túsýde.
«Ózara saýda kóleminiń artýyn, kólik pen tranzıt salasyndaǵy yntymaqtastyqtyń damýyn, bıznes baılanystardyń jandanýyn birlesken jumystyń mańyzdy nátıjesi dep sanaımyz. 2022 jyldyń qorytyndysynda elderimiz arasyndaǵy taýar aınalymy 72 paıyzǵa artyp, 440 mln dollarǵa jýyqtady. Bıyl da oń dınamıka saqtalyp otyr. 8 aıdaǵy ózara saýda kólemi 34 paıyzǵa ósti. Tranzıttik-kólik yntymaqtastyǵy dástúrli túrde ózara is-qımylymyzdyń lokomotıvi bolyp qala beredi. Mol rezervke ıe «Qazaqstan – Túrikmenstan – Iran» temir jol magıstrali – bizdiń ortaq baılyǵymyz sanalady.
Yntymaqtastyǵymyzdy odan ary keńeıtý úshin ótken jyly Kólik, tranzıt jáne logıstıkany damytý jónindegi jumys toby quryldy. Energetıka salasynda da aıtarlyqtaı áleýet bar. Qazaqstan aýmaǵy arqyly Qytaı baǵytyna túrikmen gazy turaqty jetkilip jatyr. Munan bólek, Túrikmenstannan tabıǵı gazdy Qazaqstannyń ishki naryǵyna jetkizý boıynsha ózara is-qımyldyń tabysty tájirıbesi bar», – dedi Murat Nurtileý.
Syrtqy ister mınıstri qazaq pen túrikmen dıasporasy dostyqtyń «altyn kópiri» sanalatynyn da erekshe atap ótti.
«Ekijaqty yntymaqtastyqtyń joǵary deńgeıi memleketterimizdiń halyqaralyq arenadaǵy tyǵyz ózara is-qımylynan da baıqalady. Muny kópjaqty qurylymdar aıasyndaǵy ózara qoldaý da dáleldeıdi. Astana men Ashhabad óńirlik turaqtylyqty nyǵaıtýǵa zor úles qosady», – dedi ol.
Óz kezeginde Túrikmenstan Syrtqy ister mınıstri shaqyrtýyn qabyl alyp, resmı saparmen kelgen qazaq áriptesine shynaıy rızashylyǵyn bildirdi.
«Biz bul kezdesýdi ekijaqty baılanysty odan ary keńeıtý jáne nyǵaıtý úshin mol múmkindik retinde qarastyramyz. Ekijaqty baılanystyń qarqyny óte joǵary ekendigin de atap ótkim keledi. Ony joǵary memlekettik deńgeıdegi ashyq, dostyq dıalogtan-aq baıqap otyrmyz», – Rashıd Meredov.
Kelissózder qorytyndysynda Murat Nurtileý men Rashıd Meredov Qazaqstan Syrtqy ister mınıstrligi men Túrikmenstan Syrtqy ister mınıstriligi arasyndaǵy 2024-2026 jyldarǵa arnalǵan yntymaqtastyq baǵdarlamasyna qol qoıdy.
Murat Nurtileý sapar aıasynda Túrikmenstannyń Táýelsizdik monýmentine gúl qoıý rásimine qatysty.