Astana men Almatydaǵy 11 nysanǵa «bomba qoıǵan» kúdikti ustaldy

NUR-SULTAN. QazAqparat – Nur-Sultan men Almaty qalalaryndaǵy 11 nysanǵa jáne áýejaıǵa bomba qoıylǵany týraly jalǵan habarlama taratqan kúdikti ustaldy. Bul týraly QR Іshki ister mınıstrligi Kóliktegi polıtsııa departamentinen málim etti, dep habarlaıdy QazAqparat.

Kóliktegi polıtsııa departamentiniń, QR Ulttyq qaýipsizdik komıtetiniń jáne Qostanaı oblystyq Polıtsııa departamentiniń qyzmeterleri ótkizgen birlesken is-shara barysynda Qostanaı oblysynyń 36 jastaǵy turǵyny ustaldy. Ol bıylǵy 31 naýryz kúni elektrondy poshta arqyly Nur-Sultan jáne Almaty qalalaryndaǵy 11 iri nysan men áýejaıǵa jarylǵysh zat qoıylǵany týraly jalǵan habarlama taratqan.

«Habar túsisimen «dabyl» boıynsha shuǵyl qyzmetter kóterildi. Barlyq nysan qorshaýǵa alynyp, kelýshiler men personal evakýatsııalandy. Tyńǵylyqty izdeý jumystarynan keıin jarylǵysh zattar tabylmady.

Kúdikti áreketin moıyndady. Aıǵaqty zattar tárkilendi. Ustalǵan kúdiktige qatysty «qamaýda ustaý» túrindegi bultartpaý sharasy sanktsııalandy.

QR Qylmystyq kodeksiniń 273-baby (terrorızm aktisi týraly kórineý jalǵan habarlaý) boıynsha tergeý júrgizilýde», - dedi departamentten.

Eske salaıyq, naýryz aıynyń sońynda Almatyda bir kúnde 7 nysanǵa bomba qoıylǵany týraly aqparat tústi. Dál solaı Nur-Sultan polıtsııasyna birneshe nysanǵa jarylǵysh zat qoıylǵany jóninde habarlandy.