Astana mektepteriniń birinde tútin neden shyqqany belgili boldy
Departament málimeti boıynsha, «101» shuǵyl nómirine atalǵan vıdeoǵa qatysty eshqandaı qońyraý men habarlama túspegen. Biraq mán-jaıdy naqtylaý úshin departament qyzmetkerleri vıdeodaǵy mekenjaıǵa jiberilgen.
«Tótenshe jaǵdaı mamandary anyqtaǵandaı, mektep dárethanasyndaǵy qol keptirgish qondyrǵy qysqa tuıyqtalý saldarynan isten shyqqan. Oqıǵadan zardap shekken adamdar joq. Sabaqtar shtattyq rejımde ótti», - dep túsindirdi departament mamandary.
Nur-Sultan qalalyq Tótenshe jaǵdaılar departamentiniń mamandary órt týyndaǵan jaǵdaıda ne isteý kerektigin de aıtty.
«Bolǵan jaǵdaı týraly órt sóndirý qyzmetine «101» nómiri arqyly dereý habarlap, mekemeniń mekenjaıyn, órt bolǵan jerdi jáne óziniń aty-jónin aıtý kerek. Osydan keıin bolǵan jaǵdaı týraly mekeme basshysyna habarlap, oqýshylar men qyzmetkerlerdi evakýatsııalaý boıynsha sharalar qabyldaý qajet. Budan soń qolda bar quraldarmen órt sóndirý qamyn oılastyrý kerek.
Órt qaýipsizdigi rejımi men erejeleriniń oryndalýy men saqtalýyn turaqty baqylaý mektep ákimshiligine júkteledi. Mekteptiń elektr jabdyqtary men jelileri talaptarǵa, tehnıkalyq paıdalaný erejelerine sáıkes kelýi kerek. Elektr qýatymen jumys isteıtin apparatýralardaǵy kez kelgen aqaýlar der kezinde joıylyp otyrý tıis. Qandaı da bir aqaýy bar qondyrǵylardy paıdalanýǵa tyıym salynady. Kompıýterler men keńse tehnıkasyna tutanǵysh suıyqtyqtar men materıaldardy jaqyn ustaýǵa da bolmaıdy», - delingen departamenttiń eskertpesinde.