Astana Media Week: Saıasat Nurbek jańa tehnologııalardyń bilim salasyna qalaı áser etetinin aıtty

ASTANA. QazAqparat – Qazaqstan Huawei kompanııasymen 50 tsıfrlyq zerthana ashýǵa ýaǵdalasty, TikTok kompanııasymen arnaıy memorandým bekitedi. Bul týraly QR Ǵylym jáne joǵary bilim mınıstri Saıasat Nurbek Astana Media Week paneldik sessııasynda aıtty, dep habarlaıdy QazAqparat tilshisi.

«Jańa tehnologııalar bilim salasyna túbegeıli revolıýtsııa jasaıdy degen ustanym baıaǵydan aıtylatyn. Osydan bir jarym ǵasyr buryn radıo shyqqanda, endi dástúrli konservatıvti bilim salasy ózgeredi, revolıýtsııa bolady degen boljamdar aıtyldy. Bir qyzyǵy, radıodaǵy birinshi baǵdarlamalar oqý-aǵartý baǵytynda boldy. Alaıda oqytý salasynda asa úlken ózgeris bolǵan joq. Teledıdar shyqqanda da, ınternet paıda bolǵanda da sarapshylar túbegeıli ózgerister bolady dep boljaǵan edi. Árıne pandemııa azdaǵan ózgeris ákeldi, degenmen, sol synyp, sol oqytýshy, dástúrli oqytý saqtalyp qaldy», - dedi Saıasat Nurbek.

Sonymen birge, Ǵylym mınıstri qazirgi gıbrıdtik shynaıylyq týraly baıandady.

«Shyn máninde, qazirgi tańda bilim salasynda úlken ózgeris bolaıyn dep tur. Kelesi onjyldyqta bul ózgeristi kóretin bolamyz. Nege deseńiz, endi aqparat vırtýaldy formatta jasalyp, vırtýaldy formatta taraıdy. Bizdiń balalarymyz ekige jarylǵan qos álemniń ortasynda jańa vırtýaldy shynaıylyqqa úırenip ketken. ıAǵnı olar – jańa vırýtaldy aqparatty qorytýǵa daıyn býyn. Mádenıet, qundylyqtar ózgerip jatyr, sondyqtan biz de aqyryndap daıyndyqty bastadyq. Máselen, Digital bridge konferentsııasynda Huawei kompanııasymen 50 tsıfrlyq zerthana ashýǵa ýaǵdalastyq, TikTok kompanııasymen arnaıy bólek memorandým jasap jatyrmyz. Shyn máninde bizdiń jańa saparymyz, jańa shynaıylyǵymyz qalaı bolady, bizdiń salamyzǵa qalaı áser etedi – aldaǵy úsh kúnde úlken pikirtalas bolǵaly tur», - dedi S. Nurbek.

Buǵan deıin Ǵylym jáne joǵary bilim mınıstri jýrnalısterdi oqytýda ár óńirdiń ereksheligi eskeriletinin aıtqan edi.

Aıta keteıik, Astana Media Week 26-28 qazan kúnderi ótedi. Onda 150 otandyq jáne halyqaralyq spıkerdiń qatysýymen 30-dan astam is-shara ótedi. Jyldyń basty taqyryby - «Jańa dáýir – jańa medıa». Taqyryp jobanyń úsh qundylyǵyn ashýy tıis: jańa dáýirdegi senim, jańa ýaqyttaǵy kásibılik jáne BAQ-tyń úzdiksiz damýy.

Birinshi kúni AMW qatysýshylary paneldik sessııa aıasynda Ázerbaıjan, Ózbekstan jáne Qyrǵyzstan sııaqty Ortalyq Azııa buqaralyq aqparat quraldarynyń ókilderimen ortaq syn-qaterlerge ortaq jaýaptardy qalaı tabýǵa bolatynyn talqylaıdy.

Sonymen qatar, búgin Astana Media Week aıasynda Nickelodeon telearnasy men Turanews.kz jańa aqparat portalynyń tusaýkeseri ótedi.

Astana Media Week dástúrli túrde baspasóz, radıo, Internet-jýrnalıstıka salasyndaǵy úzdik jetistikteri úshin «Úrker» syılyǵynyń saltanatty rásimimen aıaqtalady.