Astana Media Week: dástúrli medıa aptalyq bastaldy
Bıyl dástúrli aptalyq «Medıanyń áseri jáne tsıfrlyq úndestik» taqyrybynda ótip jatyr. Aldaǵy úsh kún boıy jetekshi sarapshylar, halyqaralyq uıymdardyń ókilderi jáne tanymal jýrnalıster salanyń ózekti máselelerin talqylaıdy.
Sondaı-aq halyqaralyq medıa uıymdardyń ókilderi men ındýstrııa kóshbasshylary pikirin ortaǵa salyp, jahandyq trendter men medıa-kommýnıkatsııa salasyndaǵy ozyq tájirıbesimen bólisedi. Odan bólek, is-shara aıasynda 25 jáne 26 qyrkúıek kúni «Kontent-Market» ótedi. Onda telearnalar men prodakshndar ozyq medıa jobalaryn tanystyrady dep kútilýde.
Ashylý saltanatynda Mádenıet jáne aqparat mınıstri Aıda Balaevanyń atynan quttyqtaý hatyn vıtse-mınıstr Qanat Ysqaqov oqyp berdi.
«Qurmetti áriptester, barshańyzdy jyl saıynǵy Astana Media Week aptalyǵynyń ashylýymen shyn júrekten quttyqtaımyn. Bıyl «Medıanyń áseri jáne tsıfrlyq úndestik» taqyrybyna arnalýy qoǵamdaǵy ózgerister men jańa tehnologııalyq dáýirde aqparattyq mańyzdylyǵyn taǵy da aıqyndaı túsedi. Medıanyń kúndelikti ómirde yqpaly zor, ol tek aqparatty taratý ǵana emes qoǵamdyq pikirdi qalyptastyrýshy mádenıetti damytýda úles qosady. Tsıfrlyq tehnologııa jyldam damyp, osy úrdisterdi jańa deńgeıge kóterip medıanyń yqpalyn odan ári kúsheıtedi. Bul úrdister medıa mamandarynyń biliktiligin arttyryp, jańa múmkindikterge jol ashady. Astana Media Week medıa salasynyń kóshbasshylary men kásipqoı mamandar men sarapshylardy bir alańǵa jınap, ózekti máselelerdi talqylaıtyn kásibı alańǵa aınaldy. Barshańyzǵa tabys tileımin», - delingen hatta.