Astana mańyndaǵy avıabazada qaza bolǵan ushqyshtardy eske aldy

ASTANA. QazAqparat - Búgin, Astanadaǵy 19132 áskerı bóliminiń bazasynda 2012 jylǵy 22 tamyzda arnaıy tapsyrmany oryndaý kezinde apatqa ushyraǵan Mı-17 tikushaǵynyń ekıpajyn eske alý qurmetine oraı sporttyq jarystar ótti. Bul týraly QR Qorǵanys mınıstrliginiń baspasóz qyzmeti habarlady.

«Búgin 19132 áskerı bóliminiń áskerı qyzmetshileri úshin erekshe kún. Minekı, qymbatty qarýlastarymyz ben áriptesterimizdiń opat bolǵan kúninen bastap tórt jyl ótipti.  Olar ózderiniń ómirlerin qıyp, júktelgen jaýyngerlik tapsyrmany oryndady. Búginde bul týraly eske alý qaıǵyly.  Biz olardy máńgi esimizde saqtap, olardyń erligin maqtan etip, dańqty dástúrimizdi Áýe qorǵanysy kúshteriniń óskeleń jaýyngerlerine beretin bolamyz», - dedi 19132 á/b komandıri polkovnık Maral Kárimov. 

Ajal qushqan ushqyshtardy eske alý qurmetine oraı jyl saıyn saıystar ótkizilip turady. Týrnırdiń qorytyndysy boıynsha 19132 á/b-niń komandasy jalpy komandalyq birinshi oryndy, Áskerı-áýe kúshteri qolbasshysynyń basqarmasy ekinshi oryndy jáne 2177 á/b QR UQK Shekara qyzmetiniń komandasy úshinshi oryndy enshiledi.

Týrnırdiń barlyq qatysýshylary ataýly gramotalarmen, medaldarmen, qundy syılyqtar jáne aýyspaly estelik kýbokpen marapattaldy.

Eske sala ketsek,  2012 jyldyń 22 tamyzynda Astana qalasynyń áýeaılaǵy aýdanynda arnaıy tapsyrmany oryndaý kezinde Mı-17 tikushaǵy apatqa ushyraǵan. Ekıpajdyń úsh múshesi qaza boldy. Atap aıtqanda, ekıpaj komandıri kapıtan Talǵat Dosanov, ushqysh-shtýrman aǵa leıtenant Erkin Mahambetnııazov, borttyq avıatsııalyq tehnık aǵa leıtenant Janbota Qasymov, sondaı-aq, Memlekettik kúzet qyzmetiniń qyzmetkeri aǵa leıtenant Aqylbek Mýsın.