Astana LRT: Qytaıdyń jeńil relsti poıyzdaryna tapsyrys berilip jatyr

<p>ASTANA. KAZINFORM &ndash; Qytaıdan Astana LRT jelisimen qatynaıtyn jeńil relsti poıyzdardy satyp alý boıynsha jumystar júrgizilip jatyr. Bul týraly elorda ákimdiginiń Kazinform tilshisine bergen resmı jaýabynda aıtylǵan.</p>

Ákimdiktiń baspasóz qyzmeti búgingi kúnde Astana LRT-niń qurylysy qaı kezeńge kelgeni jaıly málimet bergen:

«Estakadalyq bóliktiń qurylysy, stantsııalarda temirbeton jumystary aıaqtaldy, sondaı-aq Esil ózeni arqyly kópir salyndy. Oryndalǵan beton quıý jumystarynyń jalpy kólemi - shamamen 450 myń sharshy metr. Sonymen qatar, burǵylaý-tyǵyzdaý qadalaryn, tirekterdi ornatý, qurama arqalyqtardy montajdaý jáne monolıtti arqalyqtardy quıý boıynsha jumystar tolyq kólemde oryndaldy».

Sondaı-aq, jergilikti atqarýshy organ Astana LRT jelisimen qatynaıtyn jyljymaly quramǵa tapsyrys berý jumystary júrgizilip jatqanyn málimdedi. 

«Shart talaptaryna sáıkes 19 jyljymaly quram satyp alynady. Jyljymaly quramdardy óndirýshi el — QHR. Búgingi tańda jyljymaly quramǵa tapsyrys berý jumystary júrgizilip jatyr», - delingen jaýapta.

Foto: Vıktor Fedıýnın/Kazinform

Aıta keteıik, buǵan deıin Astanada LRT deposynyń qurylysy bastalǵany týraly jazǵan edik. Depo halyqaralyq áýejaı mańaıynda ornalasady jáne LRT júıesine tehnıkalyq qyzmet kórsetý men basqarý ortalyǵyna aınalady.

Odan bólek, LRT poıyzy operatorlaryn oqytýǵa aldyn ala qabyldaý bastalǵany habarlandy.