Astana LRT isi: Talǵat Ardan men Qanat Sultanbekovtiń qaıda júrgeni týraly aqparat bar
«Bul is qazirgi ýaqytta sotta qaralyp jatyr. Sottalýshylar qatarynda 7 adam bar, protsess jan-jaqty habarlanyp otyr. Eki tulǵany, atap aıtqanda Talǵat Ardan men Qanat Sultanbekovti izdeý jalǵasyp jatyr. Ony halyqaralyq yntymaqtastyq aıasynda júrgizýdemiz. Kúdiktilerdiń júrgen jeri týraly aldyn ala aqparat bar. Ol - alys shetel. Interpol elimizden tysqary jerde jasyrynyp júrgen kúdiktilerdi izdep jatyr», - dedi Sergeı Perov agenttiktiń alqa otyrysy aıasynda BAQ ókilderine bergen suhbatynda.
Eske sala ketsek, ótken jyly Sybaılas jemqorlyqqa qarsy is-qımyl agenttiginiń 1-shi departamentiniń asa mańyzdy ister jónindegi tergeýshisi Danııar Bekaıdarov «Astana LRT» kompanııasy boıynsha is sotqa joldanǵanyn habarlaǵan edi.
Keıinirek osy is boıynsha alǵashqy sot otyrysy qashan ótetini belgili boldy.
Aıta ketsek, Memleket basshysy Qasym-Jomart Toqaev LRT isi boıynsha jaýapty adamdar baqylaýshy organdardyń suraǵyna jaýap berýi kerektigin eskertken bolatyn.
Sondaı-aq Prezıdent byltyr kúzde LRT qurylysyn jedeldetýdi jáne oǵan qatysty isti tergeýdi tapsyrǵan bolatyn.
Artynsha ótken jyldyń qańtar aıynda Sybaılas jemqorlyqqa qarsy is-qımyl agentiginiń ekinshi departamentiniń basshysy Sergeı Perov elordada LRT qurylysyn salý barysynda qarajat urlaý qylmystyq isin tergeý sharalary aıaqtalǵanyn málim etken edi.
Onyń aıtýynsha, anyqtalǵan shyǵyn somasy 5,7 mlrd teńgeni qurap otyr. Atalǵan is boıynsha 10-nan astam adamnyń jaýapkershiligi tekserilip, úsh adamǵa izdeý jarııalanǵan.