«Astana LRT» isi boıynsha laýazymdy kúdiktiler anyqtaldy

NUR-SULTAN. QazAqparat - Tergeý toby «Astana LRT» isi boıynsha kúdikti retindegi laýazymdy adamdardy anyqtady. Bul týraly brıfıngte QR Sybaılas jemqorlyqqa qarsy is-qımyl agenttigi ekinshi departamentiniń basshysy Sergeı Perov aıtty, dep habarlaıdy QazAqparat tilshisi.

«Tergeý «Astana LRT» isi boıynsha kúdikti retindegi laýazymdy adamdardy anyqtady. Olar elorda ákimdiginiń, «Astana LRT» JShS-nyń, merdigerlik uıym basshylary men jobanyń júzege asýyna qatysty adamdar», - dedi Sergeı Perov.

Onyń aıtýynsha, qazirgi ýaqytta istiń mán-jaıyn tezirek anyqtap, kinálilerdi jaýapkershilikke tartý jumystary júrgizilip jatyr.

«Biz ákimdik pen JShS qyzmetkerlerin tekserip jatyrmyz. Naqty sheńberdi aıqyndap, aıtyp bere almaımyn. Biraq barlyq adamdar anyqtalý ústinde. Onyń ishinde ákimdiktiń basshylyq quramy da bar. 10-nan astam adam tekserilýde. Qazir tergeý amaldary júrgizilip jatyr. Biz Astana LRT qyzmetine qatysty qujattarǵa qoldyń qoıylýymen baılanysty adamdardyń aınalasyn anyqtadyq. Ár adamnyń jaýapkershilik deńgeıin anyqtaımyz», - dep tolyqtyrdy Sergeı Perov.

Eske salsaq, Prezıdent LRT qurylysyn jedeldetýdi jáne oǵan qatysty isti tergeýdi tapsyrdy.

Buǵan deıin LRT-nyń qurylysy ýaqytsha toqtatylǵany týraly habarlaǵan bolatynbyz. Oǵan qatysty Úkimet basshysy Asqar Mamın pikir bildirdi.