Astana-London baılanysy nyǵaıady – Murat Nurtileý

<p>ASTANA. KAZINFORM &ndash; Qazaqstan men Ulybrıtanııanyń syrtqy saıası vedomstvolary basshylarynyń kezdesýinde qazaq-brıtan kún tártibindegi máseleler ǵana emes, Ortalyq Azııa, Aýǵanstan men jalpy Eýrazııa keńistigindegi birqatar ózekti taqyryptar ortaǵa salyndy.</p>

QR Syrtqy ister mınıstri Murat Nurtileý óz sózinde Ulybrıtanııa Qazaqstannyń asa mańyzdy ári senimdi áriptesi, sondaı-aq eń iri saýda jáne ınvestıtsııalyq seriktesterdiń biri ekenin atap ótti.

Foto: Kazinform

«Eki eldiń qarym-qatynastarynyń tamyry tereń ári tarıhy aıtarlyqtaı baı. Sońǵy jyldary eki el arasyndaǵy syndarly saıası dıalog pen jan-jaqty yqpaldastyqty keńeıtýge baǵyttalǵan qomaqty ári júıeli is-áreketter jasalýda. Elderimizdi san qyrly is-qımyldy keńeıtý men tereńdetýge degen ortaq nıet bar. 11 jyl buryn Kemeron myrzanyń Úkimet basshysy retinde Qazaqstanǵa shekken sapary barysynda yntymaqtastyǵymyzdy strategııalyq áriptestik deńgeıge kóterý týraly birlesken málimdeme jasalǵan edi. Al, búgin Qazaqstan men Ulybrıtanııa arasynda strategııalyq áriptestik jáne yntymaqtastyq týraly kelisimge qol qoıyp, qatynastarymyzdy jańa beleske shyǵardyq», - dedi Murat Nurtileý.

Onyń aıtýynsha, bul tarıhı mańyzdy ári erekshe ekijaqty qujat Astana men Londonnyń saıası, saýda-ekonomıkalyq jáne ınvestıtsııalyq baılanystaryna tyń serpin beredi.

Bizdiń ekijaqty yntymaqtastyǵymyzdyń ózegi – saýda-ekonomıkalyq jáne ınvestıtsııalyq baılanystar ekeni sózsiz. Osy rette, alys-berisimizdi ári qaraı ulǵaıtyp, ózara tıimdi jobalar men bastamalardy qoldaýǵa degen ortaq nıetimizdi rastadyq. Elimizge ozyq tehnologııalar tartýmen qatar, asa mańyzdy ǵylymı-zertteý áleýetimizdi damytý máseleleri de talqylandy», - dedi QR Syrtqy ister mınıstri.

Belgili bolǵandaı, byltyr ekijaqty taýar aınalymy 1,2 mlrd dollardy quraǵan. Jıyrma jyldan beri brıtandyq tikeleı ınvestıtsııalar kólemi 17 mlrd dollarǵa jetken.