Astana kúnine oraı elordada konkýrdan jarys ótip jatyr
Elorda ákimdigi resmı saıtynyń málimetinshe, Astana kúnine oraı Olımpıada baǵdarlamasyna kiretin konkýr básekesinen búgin týrnır jeńimpazdary anyqtalady.
«Ata-babamyz naızanyń ushymen, bilektiń kúshimen elimizdi qorǵap, bizge keremet jer qaldyryp ketti. Mine, endi Saryarqa tórinde astanamyz jyl ótken saıyn qulpyryp, álemdik megapolıstiń birine aınaldy. Oǵan elimizdegi ár turǵynnyń ózindik úlesi bar. Astana kúnimen qatar, ulttyq dombyra kúni de atalyp ótip jatyr. Dombyranyń qandaı qasıeti bolsa, attyń da sondaı qasıeti bar. Sondyqtan búgingi at saıysyna qosh keldińizder. Atalǵan dodaǵa Almaty, Astana, Shymkent qalalarymen qatar Almaty, Qaraǵandy, Aqmola oblystarynan kelgen 80-ge tarta shabandoz synǵa túsedi. At degende ishken asyn jerge qoıatyn, salt-dástúrimen bite qaınasqan ulttyq sportymyz damı bersin!» - dedi Astana qalasynyń Ulttyq jáne olımpıadalyq at sporty túrleri federatsııasynyń prezıdenti Erlan Kanalımov.
Osy jylǵy dodanyń basty ereksheligi ulttyq quramaǵa kiretin sportshylar da jalpy júlde qory 12 mln teńgeni quraıtyn syıaqyǵa talasady.
«Astana kúnine oraı uıymdastyrylyp jatqan jarysqa ekinshi ret qatysyp jatyrmyn. Búgin jasóspirimder sanaty boıynsha bıiktigi 110 santımetrdi quraıtyn kedergilerdi baǵyndyrýǵa tyrysamyn. Byltyr júldege bir qadam jetpeı, 4-orynǵa turaqtaǵan edim. Bıyl «Jeńis» atty tulparymen jeńis tuǵyrynan kórinýge bar kúshimdi salamyn», - dep 15 jastaǵy Nurly Medethan jarys aldyndaǵy oıymen bólisti.
Uıymdastyrýshylardyń aıtýynsha, shabandozdar aldaǵy ýaqytta Almaty qalasynda ótetin Qazaqstan chempıonaty men Tashkent pen Bishkektegi Álem kýbogynyń kezeńderinde óner kórsetedi.