Astana kúni Shyǵys Qazaqstanda 23 náreste dúnıege keldi

ÓSKEMEN QazAqparat – Shyǵys Qazaqstan oblysynda Astana kúninde 23 náreste jaryq dúnıe esigin ashty, dep habarlaıdy QazAqparat tilshisi.

ShQO Aqparat ortalyǵynyń málimetine súıensek, 6 shilde – Astana kúninde kópten kútken sábıleri dúnıege kelgen shyǵysqazaqstandyq analar úshin qos mereke bolyp otyr.

Bul kúni Shyǵys Qazaqstan oblysynyń barlyq qala, aýdanynda 23 náreste dúnıege keldi. Onyń ishinde 14-i ul, 9-y qyz.

«Men kishkentaıymyzdyń Astana kúninde týǵanyna óte qýanyshtymyn. Bul mereke halqymyz úshin árqashan erekshe, al bıyl Astanamyzǵa 25 jyl toldy. Bizdiń úlken otbasymyz úshin bul kún endi qos mereke bolady. Barshańyzdy merekemen quttyqtaımyn! Aspanymyz ashyq bolsyn», - deıdi analardyń biri.

Esterińizge sala ketsek, oblysta Astana kúnine oraı barlyǵy 127 aýqymdy shara ótip jatyr.