Astana kúni: Masaıyp alatyndarǵa gala-kontsertti úıden kórýge keńes berildi

ASTANA. QazAqparat - Astana qalasynyń 20 jyldyq mereıtoıyna arnalǵan merekelik is-sharalar jalǵasýda. 6 shilde kúni «Qazaq eli» monýmentiniń alańynda - gala-kontsert, Beıbitshilik jáne kelisim saraıynyń mańynda merekelik otshashý bolady. Osy oraıda, qalalyq ІІD jınalatyn jurtshylyqty qaýipsizdik sharalary týraly eskertti, dep habarlaıdy QazAqparat.

«Tájirıbe kórsetip otyrǵandaı, barlyq turǵyndar men qonaqtar naq osy gala-kontsertti tamashalaǵysy keledi. Bul jerlerde belgili bir qaýipsizdik sharalaryn saqtaý abzal. Birinshi kezekte bul baǵaly zattarǵa qatysty. Jastar, qart adamdar mundaı jerlerde óte kóp adam - 50-60 myń halyq jınalatynyn eskermeıdi. Qyspaq bolady. Krımınaldyq tulǵalar muny paıdalanyp, baǵaly zattaryńyzdy - uıaly telefon, qujat, gadjetter men qaraýsyz qaldyrylǵan sómkelerińizdi bildirtpeı alyp ketýi múmkin. Keıbir kelýshiler úshin mundaı kontsertterdiń sońy ókinishke alyp keledi», - dedi Astana qalasy ІІD bastyǵynyń orynbasary, polıtsııa polkovnıgi Sabyr Júsipbekov ákimdikte ótken brıfıngte.

Onyń atap ótýinshe, gala-kontsertti kelip tamashalaý mindetti emes. Sebebi sol ártister ózge de alańdarda óner kórsetedi.

«Barlyq merekelik alańdarda ortaq stsenarıı boıynsha bir ǵana ártister óner kórsetedi. Bir alańnan keıin ekinshisine barady, keıin úshinshi, tórtinshi jáne besinshisine ketedi», - dedi ol.  

Sondaı-aq ІІD ókili mundaı kontsertterge balalarmen kelmeýge keńes berdi. Buǵan deıin ótken Open Air sharasynda 30 bala joǵalyp ketken.

Aıta keteıik, polıtseıler gala-kontsertke kelýshilerdi tekserip ótkizetin bolady. Kórermenge tyıym salynǵan zattardy, pırotehnıkany, alkogoldi ishimdikti, shyny jáne metall ydystaǵy ónimdi alyp ótýge, ánshiler óner kórsetetin oryndarǵa zattardy laqtyrýǵa, ishimdik ishýge nemese mas kúıinde kelýge, qorshaýlarǵa, jaryq beretin qurylǵylarǵa, aǵashtar men shatyrlarǵa jáne basqa da  adamdar turýǵa arnalmaǵan ǵımarattarǵa minýge tyıym salynady.

«Ótinip suraıtynymyz, eger alkogoldi ishken bolsańyz, kontsertti úıde teledıdardan tamashalańyz. Mundaı sharalarǵa barýdan bas tartyńyz», - dep keńes berdi S.Júsipov.

Sonymen qatar, «Qazaq eli» monýmenti alańynda gala-kontserttiń ótýine baılanysty Sh. Qaldaıaqov kóshesi men A. Baıtursynov kóshesine deıingi Táýelsizdik dańǵylynda kólik qozǵalysy shekteletin bolady. Osyǵan baılanysty ІІD avtokólikterdi aldyn ala arnaıy bólingen oryndarǵa qoıýdy usyndy.

«Jeke kóligimen keletin kórermender ózderine yńǵaısyzdyq týdyrmaýy úshin kólikterin arnaıy belgilengen oryndarǵa qoıýyn suraımyz. Ol Áziret Sultan meshitiniń jáne Trıatlon park avtoturaqtary», - dedi S.Júsipbekov. 

Mereke kúnderi 3,5 myńnan astam polıtsııa qyzmetkeri jáne Ulttyq ulannyń 1,6 myńǵa jýyq áskerı qyzmetshileri quqyqtyq tártipti qamtamasyz etetin bolady.

Gala-kontsert 6 shilde kúni saǵat 20.00-de Beıbitshilik jáne kelisim saraıynyń aldynda bastalady. Ol aıaqtalysymen Astananyń 20 jyldyǵyna oraı úlken otshashý bolady.