Astana kúni keń kólemde atap ótilýde

  ASTANA. QazAqparat - 6 shilde kúni Astananyń týǵan kúni barsha elimiz boıynsha keń kólemde atap ótilýde. Osy aıtýly datada áýelegen áýender, kúmbirlegen kúıler, shattyqtan bal-bul janǵan júzder, sábılerdiń qýanyshqa toly tátti kúlkisi, sahnada myń buralyp bı bılegen qyzdardyń óneri, palýandardyń saıystary, ulttyq oıyndar, aqyndardyń shabytty jyrlary elordamyzdyń kelbetin odan saıyn ajarlandyra tústi. Ortalyq alańdaǵy merekelik sharany tamashalaýǵa kelýshilerdiń de qarasy kóp.

Aǵymdaǵy jyly 6,7,8 jáne 9 shildeni qosa eseptegende qazaqstandyqtar elorda kúninde 4 kún qatarynan demalady. Osy tórt kún boıy el aýmaǵynda merekelik sharalar ótpek.

Astana kúnine baılanysty elordadaǵy sharalarǵa toqtalsaq,  olar ádettegideı san túrli festıvaldermen, óner jáne án keshterimen órnekteldi. Bir aptadan beri shaharda elorda turǵyndary men qonaqtary úshin mádenı-buqaralyq sharalar kóptep uıymdastyrylýda.

Búgin tańertennen «Báıterek» monýmenti alańynda otandyq jáne sheteldik óner juldyzdarynyń qatysýymen úlken kontsert ótip jatyr.

Qaladaǵy iri nysandardyń biri «Han Shatyr» alańyndaǵy aýqymdy merekelik baǵdarlama boıynsha elorda turǵyndary men qonaqtary úshin mádenı-buqaralyq sharalar kóptep uıymdastyrylady. 8 shilde kúni bul ortalyqta Qazaqstannyń estrada juldyzdarymen merekelik kontserti, al 9 shildede Astana qalasy Ulttyq orkestiriniń kontserti ótedi.

Budan bólek, búgin «Kerýen»  OSO mańyndaǵy alańda keshke deıin «Qala kúnine» arnalǵan kontsert bolady. Al erteń "Keruen City" OSO-da Búkilálemdik shokolad kúnine oraı sheberlik sabaqtar, oıyn-saýyq baǵdarlamasy josparlanǵan. 8 shildede sýret salý boıynsha sheberlik sabaqtary ótpek.

Elorda kúnin merekeleý aıasyndaǵy iri sharalardyń biri ashyq aspan astynda ótetin rok-kontsert bolmaq. Keshtiń qatysýshylary «Motor-Roller» jáne «UMAY» toptary. Kontsert 6 shildede qalalyq alańda ótedi, bastalýy - saǵat 20:00.

Astana turǵyndary men qonaqtary ortaǵasylardaǵy kóshpeliler mádenıetin tamashalaý múmkindigine ıe bolady, osy oraıda bul tamasha kórinisti «Han Shatyr» saýda-oıyn-saýyq ortalyǵynyń janynda «Kóshpeliler qalasy» tarıhı-etnografııalyq, mádenı-oıyn-saýyq kesheninen tamashalaýǵa bolady.

Sonymen qatar 15:00-de «Jastar» saraıynyń jazǵy alańynda karaokeden Astana ákiminiń kýbogyna «Bári de án aıtady» ashyq chempıonaty ótedi.  Top jarǵan ánshi ákimniń kýbogyn ıelenip, aqshalaı syılyqqa ıe bolmaq.

Sonymen qatar búgin álemdik týrne aıasynda úzdik mánerlep syrǵanaýshylar Evgenıı Plıýşenko, Irına Slýtskaıa, Nıkıta Mıhaılov, Anastasııa Martıýsheva, Nodar Maısýradze, belgili kanadalyq mánerlep syrǵanaýshy Emanýel Sandıý men basqalary muz aıdynynda ǵajaıyp «Şelkýnchık» shoý ertegisin kópshilik nazaryna usynady. Qoıylym kún saıyn shildeniń 6-sy men 15-si aralyǵynda saǵat 19.00-de «Barys Arena» stadıonynda ótedi.

V «Serper» halyq aspaptary orkestrleriniń festıvali aıasynda 6 shildede qala ákimdiginiń sahna tórinde Qazaqstan men Reseıdiń 6 orkestriniń 200 mýzykanty «Serper», «Saryarqa» syndy úzdik kúılerdi oryndaıtyn bolady. Kontsertti kórermender saǵat 13:00 - 15:00 aralyǵynda tamashalaı alady.