Astana kúni qarsańynda kókshetaýlyq kópbalaly otbasylar baspanaly boldy
Saryarqa shaǵyn aýdanynda «Nurly jer» memlekettik baǵdarlamasy boıynsha salynǵan jańa turǵyn úıden páter kiltin tapsyrý rásimine aımaq basshysy Ermek Marjyqpaev qatysyp, shańyraq ıelerin astana kúnimen jáne qýanyshymen quttyqtady.
«Barshańyzdy kele jatqan astana kúnimen shyn júrekten quttyqtaımyn. Jas elordanyń qýanyshy - árbir qazaqstandyq úshin mańyzdy mereke. Búgingi Nur-Sultan – qaryshtap damyǵan memlekettiń, máńgilik dostyqtyń sımvoly. Qalanyń álem halyqtaryna maqtana kórseter jetistikteri az emes, bolashaǵy jarqyn qala. Elimizdiń tórinen az ýaqytta boı kótergen ásem qalany turǵyzý - bul Elbasy Nursultan Ábishuly Nazarbaevtyń zor eńbegi ekeni sózsiz. Sondyqtan da Qazaqstannyń júregi máńgi soǵyp, bas qalasy odan ári gúldene bersin!» - deı kele aımaq basshysy Ermek Marjyqpaev baspanaly bolǵan kópbalaly jáne áleýmettik az qamtylǵan otbasylar men jetim balalarǵa jańa páterdiń kiltin tabys etti.
«Elorda kúnine oraı «Nurly jer» memlekettik baǵdarlamasy arqyly jańa páterdiń kiltin tapsyryp otyrmyz. Bul degenimiz - 80 otbasy baspana qýanyshyna keneledi degen sóz. Osyǵan deıin mundaı sharany halyqtyń jappaı jınalýymen saltanatty túrde ótkizip keldik. Osy kúni pandemııa bizdiń ómirimizge ózgeris engizdi. Sol sebepti sharany karantın talaptaryn qatań saqtaı otyryp ótkizýge týra kelip otyr», - dedi aımaq basshysy.
Osy oraıda, jańa úıden baspanaly bolǵandardyń biri – kópbalaly ana Almagúl Nurpeıisova qýanyshyn bólisti.
«Men búgin baspanaly bolǵanyma sheksiz qýanyshtymyn. Endi osy úıde otbasymmen baqytty ǵumyr keshemiz degen oıdamyz. Jalpy, búgingi páter baǵasy sharyqtaǵan zamanda «Nurly jer» tárizdi memlekettik baǵdarlamalardyń biz sııaqty kópbalaly otbasylarǵa sharapaty mol», - deıdi Almagúl Nurpeıisova.
Aıta keteıik, aımaq basshysy atap ótkendeı, jyl basynan beri Aqmola oblysynda 15 myń sharshy metr baspana berilip, 750 otbasy páterli boldy.
Jyl sońyna deıin taǵy 50 myń sharshy metrge jýyq baspana óz ıesin tabady.