Astana kýbogy: Almatylyq sáıgúlik 16 shaqyrymdyq báıgede top jardy

ASTANA. QazAqparat - Elordanyń 20 jyldyǵy qurmetine oraı Astanadaǵy «Qazanat» atshabarynda báıgeden «Astana kýbogy» ótip jatyr. Kýboktyń 16 shaqyrymdyq báıgesinde saıysynda Almaty oblysynan kelgen, «Murager» atty sáıgúlik mingen Aqjol Jumataı márege birinshi bolyp jetti, dep habarlaıdy QazAqparat tilshisi.

16 shaqyrymdyq báıgede 20 júırik shapqan bolatyn. Aýyzdyǵymen alysqan arǵymaqtardyń saıysynda alǵashqy 4 aınalymnan keıin 8 tulpar qatar kele jatty. Bir-birine ese bermegen segizdiktiń qatary taǵy bir-eki aınalymnan keıin sıreı bastaǵan edi. Aqyr aıaǵy, negizgi báseke 16 shaqyrymdyq saıystyń bes sáıgúligi arasynda órbidi. Arǵymaqtar jarysynda kermeni birinshi bolyp «Murager» atty sáıgúlikti mingen Aqjol Jumataı jetti. Onyń izin ala Qaraǵandy oblysynyń atynan jarysqa qosylǵan, «Laıt Endjl» atty tulparmen shapqan Rahman Álisher atty shabandoz ekinshi bolyp máre syzyǵyn kesti. Úshtikti taǵy bir almatylyq sáıgúlikti erttegen astanalyq shabandoz Kýrvanjan Arnur túıindedi.

Báıgeniń birinshi júldesin alǵan Aqjol Jumataıǵa 10 myń AQSh dollary tabystalady.

Aıta ketsek, qazir «Qazanat» atshabarynda 25 shaqyrymdyq alaman bastalady.