Astana kolledjderiniń birinde ınklıýzıvti bilim berý talaptary óreskel buzylǵan

ASTANA. QazAqparat – Elorda kásipkerleriniń quqyqtaryn qorǵaý jónindegi keńestiń kezekti otyrysynda Astana kolledjderiniń birindegi ınklıýzıvti bilim berý talaptarynyń óreskel buzylǵany týraly másele kóterildi, dep habarlaıdy QazAqparat tilshisi.

Problemanyń qaıdan týyndaǵanyn BAQ ókilderine Astana qalasy Kásipkerler palatasynyń dırektory Beısen Jolboldıev túsindirdi.

«Bizde Qazaqstan-Shveıtsarııa-Amerıka kolledji bar. Búgingi tańda ol jerde 900-den astam adam oqıdy. Sonyń ishinde 53 stýdent «osal toptarǵa» jatady. Sol stýdentterdiń quqyqtaryn qorǵaý boıynsha kedergiler kóp ekeni belgili boldy. Birinshiden, osy 53 stýdenttiń 30-yna memlekettik tapsyrys qarastyrylǵan. Biraq, sol 30 stýdentti eki topqa bólip, jeke oqytyp jatyr. Olardyń árqaısysynyń dıagnozy ártúrli, ıaǵnı bárine birdeı tásilmen bilim berý múmkin emes. Bul, árıne, olardyń quqyqtaryn buzatynyn, erejege saı emes ekenin kórsetedi», - dedi palata ókili.

Sondyqtan, kásipkerler palatasy qalalyq bilim basqarmasyna ınklıýzıvti bilim berýge beriletin memlekettik tapsyrystyń tártibin qaıta qaraýdy usynyp otyr.

«Eger basqa toptarǵa 2-3 «osal toptaǵy» stýdentten bólip, olardyń ózge stýdenttermen birge oqýyna múmkindik jasalsa, ınklıýzıvti bilim berý talabyna sáıkes keletin edi. Óıtkeni, qasyndaǵy dostary kómektesip, eshqandaı kedergisiz oqýǵa jaǵdaı jasalar edi. Bolashaqta da, jumysqa turǵanda qalypty ortadaǵy adamdarmen birlesip áreket etýge mashyqtanýy úshin osyndaı jaǵdaı jasalýy kerek», - dedi Beısen Jolboldıev.

Atalǵan 53 stýdenttiń qalǵan 23-iniń basynda da osyǵan uqsas problema bar kórinedi.

«Qalǵan 23 stýdenttiń altaýy aqyly negizde túsken. Alaıda, olar búgingi kúnge deıin oqý aqshasyn tóleı almaı otyr. Bilim basqarmasyna aıtylǵan bolatyn. «Sheshemiz» degenine biraz ýaqyt ótti. Sonyń ózi sheshilmeı otyr. Endi qalǵan 17 stýdent bar. Olarǵa bólingen grant mólsheri ózge stýdentterge bólinetin granttan eki ese kóp bolýy kerek. Óıtkeni, olardyń jeke muǵalimderi, súıemeldep júretin jetekshileri bolady. Bul zań júzinde qarastyrylǵan. Al bul kolledjde atalǵan stýdentterge ózge stýdenttermen birdeı grant qarajaty qarastyrylyp otyr. Bul kolledjdi qosymsha shyǵyndarǵa májbúrleıdi.

Qarjylandyrýdan bólek ınvataksı máselesi bar. Zań boıynsha olardyń úıden kolledjge deıin, kolledjden úıge deıin qatynaýyna jaǵdaı jasalýy kerek. Bul másele jumyspen qamtý basqarmasynyń tarapynan qamtamasyz etilmeı otyr. Olar 18-ge tolǵannan keıin mundaı azamattar óz betinshe júrip-turýy kerek degendi aıtady. Zań júzinde qarasaq, kámeletke tolsa da, kolledjde oqyp júrgen azamattarǵa ınvataksı qarastyrylýy qajet», - deıdi qalalyq kásipkerler palatasynyń dırektory.

Otyrysta atalǵan kolledj ókili de sóz sóılep, qaladaǵy ózge kolledjderdiń basynda da osyndaı problemalar bar ekenin jetkizdi. Jıyn qorytyndysy boıynsha hattama ázirlenetin boldy. Hattama kóshirmeleri qala ákimine, jumyspen qamtý ortalyǵyna, prokýratýra organdaryna joldanbaq.