Astana kásipkerlerine qazaq tilin tegin úıretedi
Bul týraly elorda kásipkerleriniń «Til týraly» zań talaptaryn saqtaýyna arnalǵan onlaın konferentsııa barysynda Astana qalasy tilderdi damytý jáne arhıv isi basqarmasy basshysynyń orynbasary Áıgerim Moldabaeva málimdedi.
Onyń aıtýynsha, kýrs bir aıǵa eseptelgen jáne 24 akademııalyq saǵattan turady.
Qatysý úshin kásipkerler qatysýshy sanyn kórsete otyryp, ótinim berýi qajet. Kýrs uıymnyń ornalasqan jerinde ótýi múmkin.
«2021 jylǵy 29 jeltoqsanda Memleket basshysy «Qazaqstan Respýblıkasynyń keıbir zańnamalyq aktilerine kórneki aqparat jáne dinı qyzmet máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańyna qol qoıdy. Zańdy qabyldaýdyń maqsaty -túpnusqalyqty saqtaı otyryp, orfografııa normalaryna sáıkes derektemeler men kórneki aqparat mátinderin jazý, «mátinniń túpnusqalyq aýdarmasy» uǵymyn engizý. Osy zań sheńberinde Qazaqstan Respýblıkasynyń 16 zańnamalyq aktilerine túzetýler engizildi. Olardyń ishinde kásipkerlikke qatysty «Qazaqstan Respýblıkasyndaǵy til týraly», «Jarnama týraly», «Saýda qyzmetin retteý týraly» jáne «Tutynýshylardyń quqyqtaryn qorǵaý týraly» zańdar bar. Bul túzetýler memlekettik til mártebesine sáıkes kórneki aqparatty mindetti túrde paıdalanýdy qamtamasyz etýge baǵyttalǵan. Bul rette olar orys tilin qoldanýdy shektemeıdi», - dep atap ótti Áıgerim Moldabaeva.
Ol zańnamalyq normalar memlekettik jáne memlekettik emes uıymdardyń derektemelerin jáne kórneki aqparatyn jazý tilin (tilderin) naqtylaıtynyn aıtty.
Memlekettik emes uıymdarǵa, atap aıtqanda kásipkerlik sýbektilerine blankilerdi, mańdaıshalardy tek memlekettik tilde, qajet bolǵan jaǵdaıda orys jáne (nemese) basqa da tilderde ornalastyrýǵa tańdaý quqyǵy berildi.
Bul habarlandyrýlar, jarnama, preıskýranttar, baǵa belgileri, mázirler, kórsetkishter jáne basqa da kórneki aqparat memlekettik tilde mindetti túrde, orys tilinde jáne basqa tilderde – qalaýy boıynsha jazylatynyn bildiredi.
Taýar (jumys, kórsetiletin qyzmet) týraly, sondaı-aq satýshy (daıyndaýshy, oryndaýshy) týraly aqparat tıisinshe qazaq jáne orys tilderinde berilýge tıis.
Memlekettik emes uıymdardyń mańdaıshalarynda paıdalanylatyn, Qazaqstanda qorǵalatyn taýar belgileri ózgerissiz jazylady.
«Til týraly» Zańnyń 21-babyna engizilgen túzetýlerdi eskere otyryp, kásipkerlerge kórneki aqparat salasynda júıeli túrde jumys júrgizýge, taýar ataýlarynyń, as máziriniń durys ári sapaly aýdarmasyn jasaýǵa keńes beremiz. Syrtqy jarnama mátinderi men kórneki aqparattyń orfografııalyq normaǵa sáıkes jazylýyn kelisý maqsatynda tegin keńes alý úshin «Qazaq tili qoǵamyna» júgine alasyz. Biz syrtqy jarnama mátinderindegi jáne kórneki aqparattaǵy qatelerdi túzetý jáne aldyn alý boıynsha birlesip jumys isteýge daıynbyz», – dep atap ótti Áıgerim Moldabaeva.
Memlekettik tildi oqytý boıynsha tegin kýrstarǵa keletin bolsaq, qosymsha aqparat alý úshin elorda kásipkerleri myna telefondarǵa habarlasa alady: 24-90-52, 8 705 103 2662, 8 778 172 4273.
«2021 jyldyń qazan aıynda qalalyq tilderdi damytý jáne arhıv isi basqarmasy men elordanyń kásipkerler palatasy arasynda memlekettik til saıasatyn nasıhattaý, til salasyndaǵy zańnama talaptaryn túsindirý jáne oryndaý jumystaryn jandandyrý maqsatynda ekijaqty yntymaqtastyq týraly memorandýmǵa qol qoıyldy. Osy memorandým aıasynda biz kásipkerlerge til týraly zańnama talaptarynyń normalaryn túsindirý, ádistemelik kómek kórsetý, jarnama salasyndaǵy ózekti máseleler boıynsha, kásipkerlerdi memlekettik tilge qarqyndy oqytý kýrstaryn uıymdastyrý boıynsha birlesken jumys júrgizemiz», – dep túsindirdi dırektordyń áleýmettik máseleler jónindegi orynbasary Nurgúl Ahmetova.