«Astana» qarjy ortalyǵynda 8 krıptobırja tirkelgen
«AHQO ekojúıesinde segiz krıptobırja tirkelgen, taǵy 19-y tirkelýdi josparlap otyr. Qamtamasyz etilmegen qansha krıptoaktıv bar ekendigi týraly resmı statıstıka joq. Keıbir málimetterge sáıkes, Qazaqstanda krıptoaktıvterdi paıdalanýshylar sany 100 000 azamattan mıllıonǵa deıin jetedi. Eger jalpy kólem týraly aıtatyn bolsaq, onda ártúrli baǵalaýlar bar, ıaǵnı birneshe mıllıardtan birneshe ondaǵan mıllıardqa deıin jetýi múmkin», - dedi E. Rysmaǵambetov Senattyń jalpy otyrysynda depýtattardyń suraǵyna jaýap bere otyryp.
Onyń paıymynsha, tsıfrlyq aktıvter týraly zań maınıng salasyndaǵy barlyq protsesti retke keltirýge múmkindik beretin bolady.
Budan buryn habarlanǵandaı, búgin Senattyń jalpy otyrysynda «Qazaqstan Respýblıkasyndaǵy tsıfrlyq aktıvter týraly» Zańy men ilespe qujattar qaraldy.
Senatorlar talqylanǵan zańdardy kontseptýaldy túrde qoldaıtyndaryn bildirdi. Alaıda, olardy qaraý barysynda depýtattar jekelegen baptarǵa birqatar ózgeris engizdi. Osyǵan oraı zańdardy senatorlardyń usynystarymen Májiliske qaıtarý týraly sheshim qabyldandy.
Zańdardyń maqsaty – tsıfrlyq maınıngti quqyqtyq retteý máselelerin sheshý. Sonyń aıasynda atalǵan qujattar elimizde tsıfrlyq aktıvterdi shyǵarýǵa jáne olardyń aınalymyna, tsıfrlyq maınıng jónindegi qyzmetti damytýǵa qajetti quqyqtyq baza qurýdy kózdeıdi. Sol arqyly zańdar tsıfrlyq aktıvterdiń zańdy naryǵyn qalyptastyrýǵa, osy salaǵa sheteldik ınvestıtsııalardy tartýǵa jáne Qazaqstan ekonomıkasyn damytýǵa yqpal etpek.