«Astana» qarjy ortalyǵy týraly halyqqa kóbirek málimet berý kerek - senator

ASTANA. QazAqparat - Parlament Senatynyń depýtaty, Ekonomıkalyq saıasat, ınnovatsııalyq damý jáne kásipkerlik turaqty komıtetiniń tóraǵasy Sársenbaı Eńsegenov «Astana» halyqaralyq qarjy ortalyǵy týraly halyq jıi málimet alyp otyrý kerektigin málim etti, dep habarlaıdy «QazAqparat» HAA tilshisi.

«Konstıtýtsııalyq zań qabyldandy, ıaǵnı osy ortalyqtyń («Astana» HQO - avt.) jumysyn iske asyrý úshin memleketimiz zańnamalyq turǵyda eń joǵary mártebege ıe zańdardy qabyldap, sizderge múmkindik berip otyr. Áńgime osy ortalyqtyń qyzmetin jandandyrý bolmaq», - dedi Kelimbetovke Eńsegenov senatorlardyń «Astana» halyqaralyq qarjy ortalyǵyndaǵy kóshpeli otyrysy kezinde.

Onyń aıtýynsha, elimizdiń jalpy naryqtyq ekonomıka, qundy qaǵazdar, saqtandyrý júıesine baılanysty tájirıbesi jetkiliksiz.

«Ortalyqtyń qyzmetin júrgizý kezinde sizderge belsendi túrde qyzmet etý kerek dep oılaımyn. Bul tek qana ınvestorlarmen nemese halyqaralyq qarjy ortalyqtarymen ǵana emes, sonymen birge jalpy qoǵamǵa, bizdiń halyqqa ortalyqtyń qyzmeti týraly jıi ashyq túrde málimet berip otyrý kerek. Sebebi, turǵyndarmen kezdesý kezinde bul másele bizdiń aldymyzdan shyǵady», - dedi senator.

Eske sala ketsek, atalǵan otyrysta Qaırat Kelimbetov «Astana» halyqaralyq qarjy ortalyǵynyń negizgi bes strategııalyq baǵytyn ataǵan bolatyn. Naqtyraq aıtqanda, elordadaǵy qarjylyq ortalyq Kapıtal naryǵy, Aktıvterdi basqarý men Private Banking, Islam qarjylandyrýy jáne Jańa qarjylyq tehnologııalarǵa basymdyq bermek.

Foto: zanmedia.kz