Astana qalasynda osy kúzde QR Qarýly kúshteriniń qataryna 600 adam shaqyrylady - podpolkovnık Ǵ. Artyqov

 ASTANA. 7 qyrkúıek. QazAqparat - Bıyl 16 aqpanda qabyldanǵan «Áskerı qyzmet jáne áskerı qyzmetshilerdiń mártebesi» týraly QR Zańy negizinde Úkimettiń qaýlysy qaıta qaralyp, 15 mamyrda «QR azamattaryn áskerı qyzmetke shaqyrýdy uıymdastyrý jáne ótkizý erejesin bekitý týraly» № 620 qaýlysy qabyldandy.

Atalmysh zańnamalardyń talaby boıynsha, QR Qarýly kúshteri qataryna aldyn ala belgilengen talaptardan ótip, densaýlyǵy, bilimi, psıhologııasy boıynsha tapsyrmalardy oryndaǵan azamattar iriktelip alynady.  Bul sharalardyń mańyzdylyǵy - áskerge shaqyrylǵandardyń Qarýly kúshterdiń naqty qaı salasyna beıimi bar ekendigin anyqtaý. Memleket basshysynyń tapsyrmasy boıynsha, elimizdiń qarýly kúshteri sanymen emes, sapasymen erekshelenýi kerek. Árbir jaýynger kásibı sheberligimen, mobıldiligimen, kez kelgen jaǵdaıǵa saqadaı saılyǵymen qyzmet atqarý qajet.

Bul týraly jýrnalısterge suhbat bergen Astana qalalyq Qorǵanys isteri jónindegi departament bastyǵynyń orynbasary, podpolkovnık Ǵanı Artyqov «Kúz-2012» jedel áskerı qyzmet atqarý naýqanyna aldyn ala zertteý jáne irikteý jumystaryna arnalǵan shara barysynda aıtty.

«Áskerı mindettilerdi aldyn ala zertteý jáne irikteý jumystary 10 shildede bastalǵan bolatyn. Qazirgi kezde 3 myńnan astam jigitter bizge kelip, arnaıy tekseristen ótti, olardyń kópshiligi áskerge jaramdy bolyp otyr. Áskerge shaqyrý komıssııasy óz jumysyn 1 qazanda bastaıdy. Sol kezde iriktelip alynǵan áskerı mindettiler naqty qandaı áskerı bólimderge bólinetini naqtylanatyn bolady», - dep atap ótti ol.

«QR Qarýly kúshteriniń qataryna shaqyrylatyn adamdardyń sany shekteýli. Sondyqtan biz Astana qalasynan 18 ben 27 jas aralyǵyndaǵy 60 myńǵa jýyq áskerı mindettilerdiń ishinen bıyl kúzgi shaqyrtýǵa 600 adamdy iriktep alamyz», - dedi podpolkovnık.