Astana qalasynda Indýstrııalandyrý baǵdarlamasyna enip, iske aspaı qalǵan 5 iri joba boıynsha qylmystyq is qozǵaldy

ASTANA. 13 jeltoqsan. QazAqparat - QR Ekonomıkalyq qylmysqa jáne sybaılas jemqorlyqqa qarsy kúres agenttiginiń Astana qalalyq departamenti ındýstrııalyq-ınnovatsııalyq 5 mańyzdy joba boıynsha jemqorlyqqa qatysty zańbuzýshylyqtardy anyqtady.

Bul týraly búgin «dóńgelek ústel» barysynda astanalyq qarjy polıtsııasy bastyǵynyń orynbasary Serik Shalambaev aıtty.

Onyń aıtýynsha, qalalyq qarjy polıtsııasy mańyzdy jobalardy qarjylandyrýmen aınalysatyn memleketttiń qatysýymen qurylǵan damý ınstıtýttary men qorlardyń jumysyn tekseredi. Bul memleket qarajatyn maqsatsyz paıdalaný, talan-tarajǵa salý, sybaılas jemqorlyq sııaqty áreketterdiń aldyn alýdyń birden bir sharasy bolyp tabylady.

Onyń bergen málimetterine qaraǵanda, qala aýmaǵynda Údemeli ındýstrııalyq-ınnovatsııalyq damý baǵdarlamasy boıynsha jalpy somasy 420 mlrd. teńgege 31 joba iske asyrylyp jatyr. 18 joba qoldanysqa berilgen, 12-siniń merzimi áli kelgen joq, al taǵy eki jobany tapsyrý ýaqyty áldeqashan ótip ketkendikten, qarjy polıtsııasy olardy problemaly jobalar dep eseptep otyr.

«Biz júrgizgen jedel-tekserý sharalarynyń negizinde 5 qylmystyq is qozǵaldy. Atap aıtar bolsaq, jylyna 5 myń tonnalyq kókónis saqtaý qoımasynyń qurylysynda, aımaqtyq tehnologııalyq parkterde ınnovatsııalyq ınfraqurylymdar salýda, «Almaty-Astana» transporttyq-logıstıkalyq jolyn tarmaqtaýda, tozyǵy jetken avtomobıl dóńgelekterin óńdeý zaýytyn salýda jáne «Astana-Almaty» ýchaskesinde talshyqty-optıkalyq baılanys júıesin salýda osyndaı olqylyqtar ketken», - dedi S. Shalambaev.