Astana qalasynda 30 eldiń táýelsiz ál-aýqat qorlary jınalady

ASTANA. QazAqparat - 5-7 qyrkúıek aralyǵynda Astana qalasynda Táýelsiz ál-aýqat qorlary halyqaralyq forýmynyń (International Forum of Sovereign Wealth Funds - budan bylaı IFSWF) otyrysy ótedi. Jıynǵa Qazaqstan Respýblıkasynyń Premer-mınıstri Baqytjan Saǵyntaev qatysady dep josparlanǵan, dep habarlaıdy «Samuryq-Qazyna» ulttyq ál-aýqat qory» AQ baspasóz qyzmeti.

IFSWF jyl saıynǵy otyrysyna 30 memleketten táýelsiz qorlardyń ókilderi qatysady. Olardyń arasynda Sıngapýrdyń táýelsiz ál-aýqat qory, Qytaıdyń ınvestıtsııalyq korporatsııasy China Investment Corporation, Ábý-Dabıdiń táýelsiz qory Abu-Dhabi Investment Authority, Reseıdiń tikeleı ınvestıtsııalar qory, Malaızııanyń  Khazanah ulttyq qory, Italııanyń Cassa Depositi strategııalyq qory, Ázirbaıjan Respýblıkasynyń memlekettik munaı qory jáne basqalary bar. Sonymen qatar otyrystyń spıkerleri men qonaqtary arasynda The Boston Consulting Group, Pricewaterhouse Coopers, Goldman Sachs, General Electric jáne álemdegi tanymal kompanııalardyń ókilderi bolady dep kútilýde.

Táýelsiz ál-aýqat qorlarynyń ókilderi sandyq ekonomıkany damytýdy, táýelsiz ál-aýqat qorlaryn damytýdyń baǵyttaryn, sátti ótken jekeshelendirýdiń mysaldaryn jáne olardy júzege asyrýda qorlardyń rólin, sonymen qatar Qytaıdyń «Bir beldeý, bir jol» bastamasynyń múmkindikteri keńinen talqylaıdy. 

IFSWF jumys komıtetteri jabyq esik jaǵdaıynda bas qosatyndyqtan, ashyq úlgidegi paneldik sessııalar 6 jáne 7 qyrkúıek kúnderi ótedi. Jıynnyń BAQ úshin ashyq bóligi 6-shy qyrkúıek kúni saǵat 16:00 uıymdastyrylatyn baspasóz máslıhatynan bastalady.