Astana qalalyq ІІD murajaıynda Uly Otan soǵysy ardagerleriniń jeke qurammen kezdesýi ótti
«Bundaı sharalar bizdiń departamentte turaqty ótip keledi. Qatary sırep bara jatqan soǵys ardagerlerine qurmet kórsetip, batasyn alý - astanalyq tártip saqshylarynyń jyl saıynǵy ádeti. Sebebi, departament basshylyǵy, «tiri tarıhqa» aınalǵan ardagerlerimizdiń estelikteri, erlik týraly áńgimeleri, otan úshin ajalmen arpalysyp, jaýmen tiresken sátteri kez-kelgen qyzmetkerdiń eline degen súıispenshiligin oıatyp, rýhyn kóteretinine senimdi», deıdi Astana qalalyq ІІD til saıasaty jáne aqparat bóliminiń bastyǵy N.Oraz.
Kezdesýdi ashqan Astana qalalyq ІІD bastyǵynyń orynbasary, polıtsııa polkovnıgi Baqytjan Beıseev ardagerlerdiń ýaqyt taýyp búgingi basqosýǵa kelgenine alǵysyn bildirip, olardyń erligi týraly estelikter jas býynǵa áskerı rýh beretinin jetkizdi. «Qan maıdanda qasyq qany qalǵansha jaýmen kúresip, eli, jeri úshin keýdesin oqqa tosqan azamattar esimi eshqashan umytylmaıdy. Olardyń erligi quqyq qorǵaý salasynda eńbek etip júrgen azamattardy otansúıgishtikke baýlyp, qylmys ataýlymen kúreste qaısarlyǵyn shyńdaı túsetinine kámil senemin», dedi ol óz sózinde.
Uly Otan soǵysynyń ardagerleri Kazıs Jolymbetov, Hasen Karıev, Fedor Tıývaev ózderiniń estelikterimen bólisip, soǵys jyldarynda bastarynan ótken oqıǵalaryn aıtty jáne jıylǵandardyń suraqtaryna jaýap berdi. Zulmat soǵysty kózben kórgen, bastan ótkergen maıdangerler sol zamannyń zapyranyn oı eleginen ótkizip, qazirgi beıbit ýaqyttyń qadirin joǵaltpaý qajettigin basa aıtty. H.Karıev soǵystyń sońǵy jyldarynda Berlın bekinisine deıin baryp, Reıhstagqa tý tikkendegi jeńistiń «tátti» dámin sezingenin aıtsa, K.Jolymbetov pen F.Tıývaev fashızmniń sońǵy demi - Japonııany talqandaýǵa deıin baryp qaıtqanymen bólisti.
Jıyn sońynda departamenti ujymy ardagerlerge Baýyrjan Momyshulynyń kitaby men gúl shoqtaryn syılap, estelik sýretke tústi.