Astana irgesindegi aýyl eki kúnge kóshpendiler mekenine aınalady

ASTANA. QazAqparat - 30 maýsym men 1 shilde aralyǵynda Astana irgesindegi Qabanbaı aýylynda «Kóshpendiler álemi» ІІІ halyqaralyq etnomádenı festıvali ótedi, dep habarlaıdy QazAqparat.

Elorda ákimdiginiń resmı saıtynda málim etilgendeı, bıyl festıval Astananyń 20 jyldyǵyna arnalmaq. Sharany «KazakhTourism UK» AQ elorda ákimdigi men Almaty oblysy ákimdiginiń qoldaýymen uıymdastyrýda.   

Festıvaldiń baǵdarlamasyna kásibı sadaqshylardyń, kókparshylardyń, búrkitshilerdiń saıysy kiredi. Qonaqtar alǵash ret saýyt-saımandary tarıhı derekkózderge negizdelip jasalǵan batyrlardyń kórsetilimdik jekpe-jegin tamashalaı alady. Sondaı-aq batyrlardyń shabandozdyq jáne at ústinde shaıqasý óneri kórsetiledi.

Festıval qonaqtary kóshpendilerdiń turmysymen tanysýǵa, qazaqstandyq qolónershilerdiń sheberlik-sabaqtaryn alýǵa múmkindik alady. Atap aıtqanda, kıiz basý, bylǵarymen, kúmispen, kózeshi urshyǵymen jumys isteýdi úırenýge, kóshpendilerdiń tarıhymen Saq, Qańly, Úısin, Ǵun, Skıf, Sarmat, Tıgrahaýda, Massaget dáýirleriniń kostıýmdi kórsetilimi arqyly tanysýǵa, búrkitshilerdiń sheberligi men aýshy qustardyń sulýlyǵyna tamsana alady. Osylaısha san qyrly etnomádenıetti sezinip, halyqtyń ómiri men salt-dástúrleri týraly jańa bilimmen ózderin baıyta alady. 

Budan bólek, álemge tanymal etno-mýzyka oryndaýshylarynyń qatysýymen mýzykalyq baǵdarlama ázirlenedi.