Astana irgesinde ashyq aspan astyndaǵy eń úlken mýzeı salynyp jatyr
Mádenıet jáne sport mınıstrliginiń málimetinshe, mýzeı-qoryqtyń aýmaǵy – 412 gektar. Bul ashyq aspan astynda ornalasqan elimizdegi eń úlken mýzeı bolady.
«Qazirgi kezde mýzeı aýmaǵyna qos qaptaldan kirýge arnalǵan bıiktigi 7 metrden asatyn kireberis qaqpa men bekinis qabyrǵalarynyń qurylysy bastaldy. Kireberis pen bekinistegi munaralar sol kezeńdegi tehnologııa boıynsha arnaıy jasalǵan qurylys materıaldarymen qaptalady.
Jobanyń negizgi maqsaty – ashyq aspan astyndaǵy mýzeıde dala órkenıetiniń ozyq jetistikterin kórsetý», - delingen mınıstrlik málimetinde.
Munda Bozoq qalashyǵymen qatar, eneolıt dáýirinen orta ǵasyrlarǵa deıingi tarıhı keshenderdiń tarıhı rekonstrýktsııasy boı kóteredi. Ár keshende materıaldyq jáne rýhanı mádenıettiń qalyptasý tarıhy kórsetiledi: saraı keshenderi, ǵıbadathanalar, turǵyn úıler, metallýrgııalyq jáne qysh peshter, ustahanalar men sheberhanalar, qolónershiler oramy, ortaǵasyrlyq bazar, petroglıfter jáne taǵy basqasy.
Bolashaqta Bozok ınnovatsııalyq joba retinde elordanyń ǵana emes elimizdiń týrıstik kartasynda tartymdy mádenı ınfraqurylymǵa aınalady dep kútilýde. Tarıhı-mádenı joba shaǵyn jáne orta bıznesti damytýǵa, jańa jumys oryndaryn qurýǵa serpin bermek.
«Búgingi jastar kózben kórip, qolmen ustaýǵa bolatyn aqparatty jaqsy qabyldaıdy. Jańa formattaǵy mýzeı olarǵa sol dáýirdiń atmosferasyn, halyqtyń turmysyn tolyq sezinýge jáne dala órkenıetiniń ozyq mádenıetimen tanysýǵa múmkindik beredi. Bul joba bolashaqta Qazaqstannyń tanymal týrıstik brendteriniń birine aınalatyny anyq. Mýzeı-qoryq ashý ishki jáne kelý týrızmin damytýǵa múmkindik beredi, elorda óńiriniń ınvestıtsııalyq tartymdylyǵyn jaqsartady, Qazaqstannyń Eýrazııanyń dalalyq tarıhynyń saqtaýshysy retindegi halyqaralyq ımıdjiniń ósýine oń yqpal etetin bolady», - dedi QR MSM «Bozoq» memlekettik tarıhı-mádenı mýzeı-qoryǵynyń dırektory Sáýle Bóribaeva.