Astana Hub arqyly ımportty yǵystyra alamyz - sarapshy

ASTANA. QazAqparat - Astana Hub arqyly ımportty yǵystyrýǵa múmkindikter mol. Bul týraly QR Prezıdentiniń janyndaǵy QSZI áleýmettik-saıası zertteýler bóliminiń ǵylymı qyzmetkeri Slıamjar Ahmetjarov aıtty, dep habarlaıdy QazAqparat.

«Elbasynyń qatysýymen keńeıtilgen Úkimet otyrysy barysynda otandyq taýarlardy óndirý jáne qyzmet kórsetý sektoryn jetildirý arqyly ımportqa táýeldilikti tómendetý qajettiligi atap ótildi. Bul baǵytta qolaıly ınnovatsııalyq ekojúıeni qurý - qazaqstandyq taýarlar men qyzmetterdi damytý úshin draıver bola alady. Memleket basshysynyń tapsyrmasy boıynsha ótken jyldyń qarasha aıynan bastap Astana Hub IT-startaptarynyń Halyqaralyq tehnoparki iske qosyldy. Munda talantty jastarǵa zamanaýı ǵylymı-zertteý zerthanalaryn paıdalaný, tálimgerlik qoldaý kórsetý, sondaı-aq eń bastysy, óz jobalaryn damytýǵa ınvestıtsııa tartý úshin múmkindikter bar», - dedi sarapshy.

Onyń aıtýynsha, Astana Hub platformasynyń tabysty oqıǵalarynyń biri «ZoomCare» medıtsınalyq jobasyna qatysty. Jobanyń negizin qalaýshy J.Eselbaevtiń josparyna sáıkes, naýqastar mobıldik qosymshalar arqyly qashyqtyqtan medıtsınalyq konsýltatsııalar ala alady. Onlaın keńes alý úshin garnıtýra men kamerasy bar smartfon jetkilikti. Bul ádisti qoldanýdyń artyqshylyqtary patsıentterge ýaqyt pen aqshany únemdeý, sondaı-aq dárigerlerge qosymsha tabys tabý múmkindigi. «ZoomCare»-de konsýltatsııalardyń ortasha quny 3000 teńge, al jeke klınıkalarda shamamen 5000 teńge.

«Qazirgi ýaqytta «ZoomCare»-de 150-ge jýyq dáriger tirkeldi. Dárigerlerdi irikteý, oqytý jáne testileý arqyly baza birte-birte keńeıýde. Sonymen qatar, paıdalanýshylar keri baılanys pen dárigerler týraly pikirler qaldyrý múmkindigine ıe. Oń baǵalar dárigerler reıtıngin arttyrady, bul óz kezeginde eń bilikti mamannyń paıdasyna tutynýshylardyń tańdaý jasaýyn jeńildetedi. Jalpy alǵanda, Astana Hub-tyń paıda bolýy túrli salalarda tehnologııalyq sheshimderdiń bolý múmkindigin beredi. Eń bastysy, bul platforma ınnovatsııalyq ıdeıalardy qalyptastyrýǵa múmkindik beredi jáne bolashaqta qazaqstandyq zııatkerlerdiń praktıkalyq jumysymen «sheteldik aqyldylardy» sapaly túrde almastyrýǵa múmkindik beredi», - dedi Slıamjar Ahmetjarov.

Eske sala ketsek, Memleket basshysynyń tóraǵalyǵymen ótken Úkimettiń keńeıtilgen otyrysynda Nursultan Nazarbaev mınıstrler men ákimderge Qazaqstannyń óz ónimderin nasıhattaýǵa shaqyrǵan bolatyn.