«Astana» HQO ókilderi SQO kásipkerlerimen kezdesti

PETROPAVL. QazAqparat – Petropavlda «Astana» Halyqaralyq qarjy ortalyǵynyń delegatsııasy oblystyń kásipkerlerimen kezdesip, onyń artyqshylyqtary týraly aıtty, dep habarlaıdy QazAqparat tilshisi.

2015 jyly Elbasy N.Nazarbaevtyń bastamasymen «Astana» Halyqaralyq qarjy ortalyǵynyń (AHQO) negizi qalandy. Ony qurýdaǵy maqsat - halyqaralyq deńgeıdegi qarjylyq qyzmetterdiń jetekshi ortalyǵyn qalyptastyrý. Petropavlǵa AHQO delegatsııasy Investorlardyń halyqaralyq aptalyǵy aıasynda jáne IOSCO qundy qaǵazdar boıynsha halyqaralyq uıymnyń qoldaýymen keldi.

«Bul – qarjy salasyndaǵy arnaıy quqyqtyq tártipteme. Onyń artyqshylyǵy - qarjy qyzmetteriniń keı túrlerine salyqtyń jeńildetilýinde, táýelsiz sot júıesi men arbıtrajy bar. Munyń árqaısysyna jeke toqtalyp, ony qalaı qoldanýǵa bolatyndyǵyn jáne ol jergilikti bızneske ne beretinin aıtamyz. Barlyq bıznes qaýymdastyqtaryn AHQO usynatyn qyzmet túrlerimen tanystyrǵymyz keledi. Elbasynyń bastamasymen qurylǵan ortalyq elimizde qarjy naryǵyn damytýǵa, bıznes ortany qalyptastyrýǵa jumys isteıdi», - dedi «Astana» Halyqaralyq qarjy ortalyǵynyń tirkeýshisi Nurhat Kóshimov.

AHQO-nyń shaǵyn kásipkerlikke de, iri bıznes ókilderine de qolaıly usynystary bar.

«Biz búgin álemdik trendterdiń biri – ıslamdyq qarjylandyrý tetikteri jaıynda aıtamyz. Onyń aıasynda shaǵyn, orta jáne iri bıznes te qajetti ınvestıtsııa tarta alady. Sondaı-aq «jasyl» qarjylandyrý bar. ıAǵnı AHQO bırjasynda «jasyl» qundy qaǵazdardy ornalastyrý. Nátıjesinde balamaly energetıka boıynsha jumys isteıtin kásiporyndar qosymsha qarjylandyrylady», - dedi Nurhat Kóshimov.

Onyń aıtýynsha, «Qazatomprom» jaqynda AHQO bırjasynda qosymsha aktsııalardy ornalastyrdy. Alǵash ret qundy qaǵazdar ótken jyldyń qarasha aıynda jekeshelendirý baǵdarlamasy aıasynda ornalastyrylǵan. Onyń pikirinshe, bul – jergilikti kompanııanyń qazaqstandyq jáne sheteldik ınvestorlardy tartýynyń sátti kórinisi.

«Aımaqtyq bıznes kásipkerlikti damytýǵa qoldaý kórsetý úshin qurylǵan AHQO-nyń usynystaryn tıimdi paıdalanady dep oılaımyn», - dedi Nurhat Kóshimov.

Ortalyq mamandary 30 qyrkúıek pen 6 qazan aralyǵynda aptalyq aıasynda elimizdiń 7 qalasyna baryp, jıyn ótkizýdi josparlaǵan. Delegatsııa SQO-dan keıin Aqtaý qalasyna jol tartpaq.