«Astana» HQO men KASE qatar jumys isteı bere me

ASTANA. QazAqparat - Qazaqstandyq qor bırjasy (KASE) basqarma tóraǵasynyń orynbasary Natalıa Horoshevskaıa «Astana» HQO jumysyna qatysty pikir bildirdi, dep habarlaıdy QazAqparat tilshisi.

 «Biz ózimizdiń strategııamyz boıynsha jumys isteı beremiz. Bálkim, keıbir emıtentter shyǵyp ketedi. Endi, «Astana» halyqaralyq qarjy ortalyǵy men onyń bırjasy sol emıtentter úshin qurylyp jatyr ǵoı. Olar sol alańǵa da shyǵyp, ózderiniń qundy qaǵazdaryn ornalastyra alady. Saýda-sattyq júredi. Shamasy, «Astana» qarjy ortalyǵy men KASE eki alań bolyp qala beredi. Olar ózderine tıesili segmentte jumys isteıdi.

Halyqaralyq qarjy ortalyǵy sheteldik ınvestıtsııalardy tartý úshin qurylǵan. Sonyń arqasynda Qazaqstannyń iri kompanııalary óz jerinde otyryp, shetelden aqsha tarta alady. Dál sol alańda álemniń iri ınvestorlarymen baılanys ornatady. «Astana» Halyqaralyq qarjy ortalyǵynyń negizgi maqsaty sol», - N.Horoshevskaıa QazAqparat tilshisine bergen suhbatynda.

Onyń aıtýynsha, KASE óz segmentinde qala beredi. Qazaqstandyq qor bırjasy otandyq kompanııalarǵa qyzmet kórsetýin jalǵastyrady. «Bizdegi kompanııalar «Astana» halyqaralyq qarjy ortalyǵyna aýysyp kete me, joq pa, oǵan naqty jaýap bere almaımyn. Sebebi árbir kompanııa qaı bırjaǵa shyqsa da, qosymsha qajyny qalaı tartamyn dese de, óz erki. Bir bırjaǵa shyqty ma, boldy, sol jerde qalady degen qaǵıda joq. Kompanııaǵa qosymsha qarjy qajet bolsa, barlyq múmkindikter pysyqtalady. Qorlar, bırjalar, bankter jáne taǵysyn taǵy. Sondyqtan ol taǵy saýda-sattyqqa shyǵamyn dese, aldymen bırjalardyń sharttary pen usynystaryn qaraıdy. Sóıtip, ózine tıimdi degen alańdy tańdaıdy», - dep atap kórsetti N.Horoshevskaıa.