Astana halyqaralyq qarjy ortalyǵy Úndistanda tanystyryldy

MÝMBAI. QazAqparat -16 sáýir kúni Úndistannyń asa iri ekonomıkalyq ortalyǵy Mýmbaı qalasynda «Astana» Halyqaralyq qarjy ortalyǵyna (AHQO) arnalǵan dóńgelek ústel otyrysy ótti, dep habarlaıdy «QazAqparat» HAA-nyń menshikti tilshisi.

«Observer Research Foundation» (ORF) taldaý ortalyǵynda ótken sharada Qazaqstannyń Úndistandaǵy Elshisi Bolat Sársenbaev eki el arasyndaǵy yntymaqtastyqtyń basym baǵyttaryn atap kórsetip, úndistadyq bıznes ókilderin qazaq-úndi saýda baılanystarynyń damý qarqynymen tanystyrdy.

AHQO-nyń jahandyq naryqtar jónindegi basshysy Ámına Turǵulova, AHQO-nyń bıznesti damytý toby basshysynyń orynbasary Nursultan Serikbaı jáne Azııany zertteý ınstıtýtynyń dırektory Sultan Ákimbekovter Qarjy ortalyǵynyń qurylymy, maqsattary, artyqshylyqtary men basty erekshelikteri týraly áńgimeledi.

Úndistannyń «Gateway House» taldaý ortalyǵynyń bas dırektory, zertteýler jónindegi dırektory Akshaı Mathýr Qazaqstannyń halyqaralyq arenadaǵy jetistikterin joǵary baǵalap, AHQO eldiń jáne jalpy óńirdiń ekonomıkalyq damýyna serpin beretinin aıtty.

«Dóńgelek ústel» barysynda saqtandyrý salasyndaǵy álemdegi asa iri kompanııalardyń biri «General Insurance Company» (GIC) memlekettik korporatsııasynyń basshylyǵymen kelissózder ótti. Atap aıtqanda, Qazaqstan Elshiliginiń AHQO alańynda bıznesti saqtandyrý salasynyń Ortalyq Azııadaǵy tuńǵysh «Astana-Re» kompanııasyn qurý týraly bastamasyn iske asyrý perspektıvalary talqylandy.

GIC basshylyǵy bıyl mamyr aıynda ótetin 12-shi Astana ekonomıkalyq forýmyna qatysatynyn rastap, AHQO-men yntymaqtastyq kelissózderin jalǵastyrýǵa ázirligin bildirdi.

Avtor: Sadyq Ákejanov