«Astana-Eýrazııa keńistigindegi jańa Elorda» atty halyqaralyq konferentsııa ótti
Konferentsııa jańa Astana ıdeıasyn nasıhattaý, Eýrazııa keńistiginde Astana qalasynyń qalyptasý jáne damý tarıhyn zerdeleý, Astananyń halyqaralyq arenadaǵy qaýipsizdik, beıbitshilik jáne toleranttylyq máseleleri boıynsha is-sharalar tájirıbesin keńinen taratý maqsatymen uıymdastyryldy.
«Astananyń Elorda bolǵanyna 20 jyl bolǵanymen onyń tarıhy tereńde. Aıtalyq, «Máńgilik El» qaqpasy salynýynyń ózindik tarıhy bar. Áýejaıynan qalaǵa keletin Orynbor, Turan dańǵyldaryn salarda másele týyndady, sebebi bul qorǵannyń astynda 3 myń jyl buryn babalarymyzdyń qabiri jatyr. Osyndaı tarıhı sátte Elbasymyz Nursultan Nazarbaev pen sol kezdegi ákimi Imanǵalı Tasmaǵambetov oryndy ári ádil sheshim qabyldady, qabir qadirsiz qaldyrmaı «Máńgilik El» qaqpasyn salý. Mine búginde ol Astananyń ǵana emes, elimizdiń basty sımvoldarynyń biri bolyp tur», - dedi QR UǴA akademıgi, tarıh ǵylymdarynyń doktory Orazaq Smaǵulov.
Konferentsııa qatysýshylary óz baıandamalarynda Astananyń qalyptasý tarıhynan bastap, 20 jyl júrip ótken joly, odan bólek Elbasynyń Astanany elorda ǵana qylyp qoımaı, Eýrazııanyń júregine aınaldyrýy sóz boldy. Sebebi, Astana qalasynyń 20 jyldyq mereıtoıyn merekeleý Elbasymyz N.Á. Nazarbaevtyń «Bolashaqqa baǵdar: rýhanı jańǵyrý» atty maqalasyndaǵy ıdeıasymen ushtasyp jatyr.
«Men Astananyń 20 jyldyǵyn jaı mereıtoı emes, tamasha tabystyń 20 jyldyǵy der edim. Italııada keremet qalanyń ózine tán úsh faktory bolýy tıis, ol aldymen ózine tán ereksheligi, ádemiligi, ekinshi kezekte ystyq júregi jáne ashyq, jarqyn aqyl. Atalǵan faktorlardyń barlyǵy Astanadan tabylady», - dedi Qazaqstandaǵy Italııa Respýblıkasynyń Tótenshe jáne Ókiletti elshisi Paskýale D'Avıno.
Konferentsııa aıasynda qonaqtarǵa QR Ulttyq mýzeıi ǵylymı kitaphanasynyń uıymdastyrýymen Astana qalasynyń mereıtoıyna arnalǵan kitap kórmesi usynylyp jáne «Astana» zalyna ekskýrsııa ótkizildi.