Astana-Ereımentaý-Pavlodar tas jolynyń problemalyq ýchaskesinde jóndeý jumystary aıaqtaldy

ASTANA. QazAqparat – Pavlodar oblysynda «Astana-Ereımentaý-Pavlodar» respýblıkalyq avtojolyndaǵy 235-259 shaqyrymdy qamtıtyn problemalyq ýchaskede jóndeý jumystary aıaqtaldy. Bul týraly Indýstrııa jáne ınfraqurylymdyq damý mınıstri Qaıyrbek Óskenbaev telegram kanalynda jarııa etti, dep habarlaıdy QazAqparat.

Aıtýynsha, 138 myń sharshy metr jol jóndelip, oǵan 35 jol-qurylys tehnıkasy jumyldyrylǵan. Asfaltbeton jabynyn tóseý jumystary tolyq kólemde oryndaldy.

«Shynymen, atalǵan joldyń osy ýchaskesine qatysty másele aımaqtaǵy kóp jyldan beri qordalanyp, sheshilmeı kelgen suraqtardyń biri edi. Aıta keterligi, avtomobıl joldarynyń, onyń ishinde jergilikti mańyzy bar avtomobıl joldarynyń sapasy el Prezıdentiniń Qazaqstan halqyna Joldaýynda mańyzdy oryn aldy. Buǵan deıin Memleket basshysy 2025 jylǵa qaraı sapaly jergilikti joldardyń úlesin 95%-ǵa deıin jetkizýdi tapsyrǵan bolatyn. Bul baǵyttaǵy jumystar mınıstrligimizdiń kún tártibinen túspeıdi», - deıdi vedomstvo basshysy.