Astana dámhanalaryna ıt etin satqan adam sottaldy

ShORTANDY. QazAqparat – Shortandy aýdanynda ıtterdi zańsyz atýmen jáne olardyń etin satýmen aınalysqan turǵynǵa sot úkimi jarııalandy. Burynǵy veterınarııa qyzmetkeri 200 AEK kóleminde aıyppul tóledi, dep habarlaıdy QazAqparat tilshisi.

Aqmola oblysy polıtsııa departamentiniń baspasóz qyzmetiniń málimetinshe, janýarlarǵa qatygezdik jasaý týraly qylmystyq is 20 aqpanda tirkelgen. Belgili bolǵandaı, Shortandy aýdany Damsa aýylynyń 41 jastaǵy turǵyny qańǵybas ıtterdi aýlap, etin satýmen aınalysqan. Polıtsııa er adamnyń úıin tintý kezinde 750 keli ıt etin tapty.

Polıtsııanyń habarlaýynsha, elordalyq kafelerdiń biri qaskúnemnen 150 kelige jýyq et satyp alǵan, ol úshin 100 myń teńgeden astam aqsha tólegen.

«Polıtseıler anyqtaǵandaı, er adam buryn veterınarııa qyzmetinde jumys istegen jáne ıtterdi qalaı atýǵa bolatynyn bilgen. Tártip saqshylary kúdiktini tintý barysynda «Adelın-sýper» preparaty bar 26 drotık, 190 drotık salynǵan 19 plastına, ınesi bar shprıts, tutqysh tabyldy jáne sottan keıin bári joıyldy», - dep habarlady vedomstvodan.

Sonymen birge, polıtseıler Shortandy aýdandyq polıtsııa bólimi tergeýshisiniń jedel jumysyn atap ótti, ol tórt tomdyq materıaldy eki apta ishinde sotqa jibergen.

«Shortandy aýdany sotynyń úkimimen er adamǵa qatysty 200 AEK, ıaǵnı 690 000 teńge kóleminde aıyppul túrinde jaza taǵaıyndaldy. Qazirgi ýaqytta bul aıyppul tólendi. Azamattarǵa zańsyz atýǵa jáne janýarlarǵa qatygezdikpen qaraýǵa zańmen tyıym salynǵanyn eske salamyz», - dep túıindedi polıtsııa.