«Astana club» otyrysyna reseılik sarapshylar da qatysady

NUR-SULTAN. QazAqparat - «Astana klýbynyń» besinshi otyrysyna qatysatyn spıkerler qatarynda reseılik saıasatkerler men sarapshylar bar, dep habarlaıdy QazAqparat.

Mereıtoılyq forým sarapshylary quramyna Reseı strategııalyq zertteýler ınstıtýtynyń dırektory Mıhaıl Fradkov, RF Memlekettik Dýmasynyń komıtet tóraǵasy, BRIKS zertteý jónindegi ulttyq komıtettiń basqarma tóraǵasy Vıacheslav Nıkonov, EADB janyndaǵy Eýrazııalyq turaqtandyrý jáne damý qorynyń bas ekonomısi Evgenıı Vınokýrov, «Órkenıetter dıalogy» zertteý ınstıtýty baqylaý keńesiniń tóraǵasy Vladımır ıAkýnın men Reseı saıası zertteýler ortalyǵy keńesiniń tóraǵasy Evgenıı Býjınskıı kirdi.

RF sarapshylary klýbtyń besjyldyq jumystaryna udaıy qatysyp keledi.

Jalpy aıtqanda, bıyl Nur-Sultan qalasynda halyqaralyq deńgeıdegi 50-den astam sarapshy men saıasatker jáne dıplomat bas qosady. Qazaqstan men Reseıdi qosqanda AQSh, Ispanııa, Italııa, Japonııa, Serbııa, Aýstrııa, Grýzııa, Norvegııa, Qytaı, Qyrǵyzstan, Úndistan, Belgııa, Aýǵanstan, Shvetsııa, Ońtústik Koreıa men Ulybrıtanııa elderinen meımandar keledi.

Esterińizge sala keteıik, aımaqtaǵy qaýipsizdik pen geosaıasat máselelerin talqylaýǵa arnalǵan aýqymdy alańnyń besinshi jylsaıynǵy otyrysy 2019 jyldyń 11-12-shi qarasha kúnderi «Nazarbaev ortalyǵynda» ótedi. Klýb otyrysynyń basty taqyryby: «Úlken Eýrazııa: jahandyq yntymaqtastyqtyń jańa qurylymy jolynda».

Klýbtyń saraptamalyq talqylaýyna AQSh, Qytaı jáne Reseı arasyndaǵy shıelenistiń ýshyǵýy, saýda protektsıonızmi men popýlıstik kóńil-kúıdiń ornyǵýy, sondaı-aq Iran men Soltústik Koreıa tóńireginde jańa kelispeýshilikterdiń boı kórsetýi syndy ózekti máseleler arqaý bolmaq.

Ásirese, Eýrazııada yntymaqtastyqtyń bolashaq qurylymyn qalyptastyrý taqyrybyna úlken kóńil bólinip, jahandyq qaýipsizdiktiń syn-tegeýrinderine (zymyran-ıadrolyq saladaǵy baqylaýsyz jarys máselesi) qarsy turý joldaryn izdestirýge nazar aýdarylady.

Shara aıasynda Álemdik ekonomıka jáne saıasat ınstıtýty Astana klýbynyń qoldaýymen jahannyń jetekshi sarapshylarynyń strategııalyq boljamdaryn baǵamdaǵan «Eýrazııa 2020 úshin 10 basty syn-qater» reıtıngisiniń kezekti shyǵarylymy tanystyrylady.

Qazaqstannyń Tuńǵysh Prezıdentiniń tóraǵalyǵymen ótetin, is-sharanyń negizgi ózegi sanalatyn Klýbtyń plenarlyq otyrysynda «Úlken Eýrazııany qurý: seriktestiktiń jańa úlgisi» taqyryby talqylanady.

Klýb jumysyn uıymdastyrýshylar - QR Tuńǵysh Prezıdenti-Elbasy qory men Álemdik ekonomıka jáne saıasat ınstıtýty.

«Astana klýbynyń» jumysyna dástúr boıynsha Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev qatysady.

Besinshi basqosýdaǵy otyrystardyń bir bóligi «Chatham house» erejesine saı uıymdastyrylady. ıAǵnı talqy jabyq sıpatta ótkiziledi jáne álem men Eýrazııanyń eń ózekti ári kókeıkesti máseleleri ashyq kóteriledi.

Osy jyldar ishinde klýb otyrystaryna álemniń 40 elinen 200-den astam spıker qatysty.