Astana bıýdjetiniń jyldyq kirisi 100 mlrd teńgemen tolyqty
Qoǵamdyq keńes múshelerine naqtylanǵan bıýdjet jobasyn Astana qalasynyń ekonomıka jáne bıýdjettik josparlaý basqarmasynyń basshysy Qaısar Mańqaraev tanystyrdy.
«Jeke kiris túsimderi jónindegi jospardy 99,5 mlrd teńgege ulǵaıtý usynylady. Onyń ishinde salyq túsimderiniń josparyn 58,4 mlrd teńgege, salyq emes túsimderdi 39,5 mlrd teńgege jáne negizgi kapıtal túsimderin 1,6 mlrd teńgege ulǵaıtý kózdelip otyr. Shyǵystarǵa kelsek, áleýmettik kórsetýge mindetti gıgıena quraldarymen jáne ınvataksı qyzmetterimen qamtamasyz etý úshin qosymsha 2,029 mlrd teńge qarajat qosymsha qarastyryldy», — dedi ol.
Qala bıýdjetiniń shyǵys bóliginde birneshe mańyzdy baǵyttyń bıýdjeti qaıta naqtylanǵan.
Atap aıtsaq, men dárilik zattardy satyp alýǵa qosymsha 183,3 mln teńge, memlekettik shyǵarmashylyq tapsyrystardy iske asyryp, kitaphanalardy qamtamasyz etý úshin 1,8 mlrd teńge, sporttyq qurama komandalardyń múshelerin daıarlaýǵa, balalar men jasóspirimderge qosymsha bilim berýge qosymsha 1,4 mlrd teńge, kólik jáne jol-kólik ınfraqurylymyn damytý basqarmasyna 9,8 mlrd teńge, jylý energetıkasy júıesin damytýǵa, energııa shyǵyndaryn sýbsıdııalaýǵa qosymsha 34,8 mlrd teńge, ınjenerlik-kommýnıkatsııalyq jeliler qurylysyn jalǵastyrýǵa, jataqhana qurylysyn qosa qarjylandyrýǵa, satyp alynǵan páterlerdiń bereshekterin óteýge qosymsha 11,2 mlrd teńge, sýmen jabdyqtaý, káriz-tazartý júıesiniń qurylystaryn jalǵastyrýǵa qosymsha 5,2 mlrd teńge, jer ýchaskelerin alyp qoıýǵa, lıft aýystyrýǵa qosymsha 2 mlrd teńge bólindi.
«Osylaısha, engizilgen ózgeristerdi eskere otyryp Astana qalasynyń 2024 jylǵa arnalǵan naqtylanǵan bıýdjetiniń jalpy kólemi 1 trln 309 mlrd 548 mln teńge bolady. Onyń ishinde jeke kiris túsimderi 987 mlrd 770 mln teńge dep belgilenedi», — dedi basqarma basshysy.
Talqylaýdan keıin qoǵamdyq keńes músheleri naqtylanǵan bıýdjetti maquldap daýys berdi.