Astana bazarlarynda tártip ornaı bastady

ASTANA. QazAqparat - Ákimdikte Baıqońyr aýdanynda ornalasqan «Alash», «Sharyn», «Sapar», «Ámir» jáne «Bıg Shanhaı» iri bazarlarynyń dırektorlarymen jınalys ótti. Bazar ákimshiligine memleketke tıesili jer telimderinde zańsyz salynǵan qurylysty birneshe kúnniń ishinde buzý týraly nusqama berildi, dep habarlaıdy QazAqparat Astana ákimdiginiń resmı saıtyna silteme jasap.  

Júrgizilgen monıtorıng nátıjesinde atalmysh bazarlarda zańsyz salynǵan saýda jáne túrli qyzmet kórsetetin 159 oryn bar. Onyń ishinde 26 - pavılon, 14 dúńgirshek, 81 konteıner, sondaı-aq, kafe-ashana, qalqalar, japsarlas qurylystar, bıodárethanalar. Ákimdik aqparaty boıynsha osy oryndarda jabaıy saýda men kassalyq apparattardy paıdalanbaı, tirkeýden ótpegen saýda men qyzmet kórsetý qyzyp tur. Bul nysandarda órtke qarsy qaýipsizdik jáne sanıtarlyq normalar saqtalmaǵan, bundaı jaǵdaı satýshylar men satyp alýshylardyń densaýlyǵy men ómirine qater tóndiredi. Keıbir saýda oryndary memleketke tıesili jer telimderinde salynǵan.

Sonymen qatar, bazar qojaıyndary memleketke tıesili jerde salynǵan jańaǵy saýda alańdaryn jalǵa berip paıda tapqan.   Ákimdik bul zańsyzdyqty birden toqtatýdy jáne úsh kúnniń ishinde zańsyz saýda oryndaryn bazarǵa tıesili jer telimine kóshirýdi talap etti.   

Qala ákimdigi atalǵan bazarlar aýmaǵynda qurylys salý josparlaryn qarastyrdy. Qazirgi kezde maqsatty qoldanýy avtoturaq bolýy tıis jer telimderinde saýda konteınerleri men pavılondar qoıylǵan.

«Eger ol jerdiń maqsatty qoldanylýy avtoturaqqa arnalsa, onda saýda oryndary emes avtoturaq bolýy tıis», dedi ákimdikte.

Bazar ıelerine ózderine bólingen jerdi maqsatyna qaraı paıdalaný týraly eskertpe berildi jáne jýyq arada oryndalýy tıis. Sondaı-aq, jıynda qalaǵa kiretin iri joldardyń biri Alash tasjolyndaǵy kólik júıesine tártip ornatý máselesi qaraldy.  

Ákimdik basshylyǵy bazarlar aýmaǵyna kiretin joldar shemasyn qaıta qaraý kerektigin jáne ol júrdek magıstral qozǵalysyna kedergi keltirmeý  kerektigin aıtty. Bazarlar ákimshiligine ortalyq kireberis esikterdi qarama- qaıshy betke aýystyrýdy, al kólik jáne jol-kólik ınfraqurylymyn damytý basqarmasyna  satyp alýshylar úshin yńǵaıly kirme joldar, aıaldama pavılondaryn ornatýdy qamtamasyz etý tapsyryldy.

«Biz barlyǵy tártipke saı jáne qala turǵyndary úshin yńǵaıly bolýyn qalaımyz. Sizderdiń saýda oryndaryńyzǵa turǵyndardyń kóbi barmaıdy, sebebi onda ashyǵyn aıtqanda beı-bereketsizdik oryn alǵan», dedi ákimdikte «Alash», «Sharyn», «Sapar», «Ámir» jáne «Bıg Shanhaı» bazarlarynyń ıeleri men dırektorlaryna.  

8 aıda elordada 250 zańsyz salynǵan qurylys buzyldy, onyń ishinde 23 saýda pavılony, 4 turǵyn úı qurylysy, 143 metall garaj, 4 japsyrma, 74 konteıner men 2 qorshaý bar. Sot sheshimimen 37 qurylys buzylǵan, onyń 29 - kommertsııalyq, 8 -i turǵyn úı nysany. Ózine tıesili emes jerge óz betimen kúrdeli qurylystardy salý, shekteýler qoıý men saýda konteınerlerin ornatý arqyly jer telimderin keńeıtý jolymen aınalysqan «Ortalyq bazar», «Kók bazar», «Sharyn», «Alash» bazarlarynda ornalasqan 5 sýbekti ákimshilik jaýapkershilikke tartylyp, aıyppul salyndy (jalpy somasy 1 mln tg).