«Astana Balettiń» Nıý-Iorkte óner kórsetýi: Halyq zalǵa syımaı qaldy

NЬıÝ-IORK. QazAqparat - «Astana Balet» teatry trýppasynyń AQSh-tyń  Nıý-Iork qalasynda óner kórsetýi jergilikti turǵyndar arasynda ajıotaj týdyrdy, dep habarlaıdy «QazAqparat» HAA tilshisi.

Lınkoln-ortalyqta ornalasqan Alice Tully Hall ǵımaratynyń kontserttik zaly aldynda keshtiń bastalýyna birneshe saǵat qalǵan kezde uzyn-sonar kezek qalyptasty. Alaıda, zaldyń syıymdylyǵyna baılanysty óner súıer qaýymnyń barlyǵy kontsertke kire almady.

«Men baletti jaqsy kóremin jáne qazaqstandyq balet mektebiniń horeografııasyn tamashalap, ulttyq naqyshtyń erekshelikterin sezingim keledi. Sondyqtan búgin osynda keldim, kirý bıletine qoljetkizgenim úshin qýanyp otyrmyn», - dedi QazAqparat tilshisine Krıs Djonson.  

Kontsert bastalmas buryn kórermender foıede «Qazaqstan álem sýretshileriniń kózimen» atty fotokórmesin tamashalady.

«Biz Astana, EKSPO-2017, Qazaqstannyń tabıǵaty, sondaı-aq qazaqstandyqtardyń dástúri men mádenıeti beınelengen 50 sýretti kórmege qoıdyq. Kontsert zalynda bos oryn bolmady. Bul kesh eshkimdi beı-jaı qaldyrmaǵany sózsiz - kórermender ár nómirdi súısinip otyryp tamashalady», - dedi  fotokórmeniń uıymdastyrýshysy, Ǵabıt Músirepov atyndaǵy balalar men jasóspirimderge arnalǵan Qazaq memlekettik akademııalyq teatrynyń dırektory Sábıt Ábdiqalyqov.




Eske salaıyq, atalmysh kontsertti Qazaqstan Prezıdenti Nursultan Nazarbaev tamashalady.  

«Astana Balet» teatry «Jahandaǵy zamanaýı qazaqstandyq mádenıet» jobasy aıasyndaǵy «Qazaqstan Astana Balet Gala» baǵdarlamasyn usyndy. Baǵdarlamaǵa «Arýlar», «Aq qyz», «Ásemqońyr» horeografııalyq mınıatıýralary, «Şelkýnchık» baletindegi adajıonyń klassıkalyq redaktsııasy jáne basqa da qoıylymdar engen.