Astana balabaqshalary memlekettik satyp alýdy zańdy buza otyryp ótkizgen

NUR-SULTAN. QazAqparat – Elordanyń kóptegen balabaqshasy memlekettik satyp alý protsedýralaryn zań buzýshylyqqa jol bere otyryp ótkizgen. Bul týraly QR Qarjy mınıstrligi Іshki aýdıt komıtetinen málim etti, dep habarlaıdy QazAqparat.

Tekserý memlekettik satyp alýdyń veb-portalynda ótkizilgen. Onda mektepke deıingi uıymdarda, jetim balalar men ata-ana qamqorlyǵynsyz qalǵan balalarǵa arnalǵan bilim berý uıymdarynda tárbıelenetin jáne bilim alatyn balalardy tamaqtandyrýdy qamtamasyz etýmen baılanysty taýarlardy satyp alý protsedýralary nazarǵa alyndy.

Anyqtalǵandaı, Nur-Sultan qalasynyń mektepke deıingi mekemeleri bıylǵy birinshi toqsanda balabaqsha tárbıelenýshileri úshin azyq-túlik satyp alý rásimderin kóptegen buzýshylyqtarmen ótkizgen. Muny Nur-Sultan qalasy boıynsha Іshki memlekettik aýdıt departamentine satyp alýǵa qatysqan jeke jáne zańdy tulǵalardan kelip túsken kóptegen aryz rastaıdy.

«Júrgizilgen aýdıtorlyq is-sharalar barysynda mektepke deıingi kóptegen mekemede Taýar jetkizýshini tańdaý krıterıılerin esepteý bóliginde birdeı buzýshylyqtarǵa jol berilgen. Bul tıisinshe satyp alý qorytyndysyna áser etti.

Aýdıt obektileriniń mekenjaıyna anyqtalǵan buzýshylyqtardy joıý jáne olarǵa jol bergen tulǵalardyń jaýapkershiligin qaraý týraly nusqamalar jiberildi», - delingen vedomstvo málimetinde.