Astana avtobýstarynda tegin júre alatyn azamattardyń sanaty keńeıdi

ASTANA. QazAqparat - Qańtar aıynan bastap Astana qalasynda tirkelgen jáne turaqty turatyn, qalalyq jolaýshylar kóliginde jol aqysyn tóleýden bosatylǵan azamattar sanatynyń tizimi keńeıdi, dep habarlaıdy QazAqparat.

City Transportation Systems málimetinshe, endi Astana qalasy máslıhatynyń 2017 jylǵy 20 shildedegi № 167/21-VI sheshiminiń 2-taraýynyń 5-tarmaǵyna sáıkes, áleýmettik jeńildigi bar azamattar sanaty mynadaı:

- Uly Otan soǵysynyń qatysýshylary men múgedekteri jáne olarǵa teńestirilgen adamdar;

- jasy jáne eńbek sińirgen jyldary boıynsha zeınetkerler, sondaı-aq jasy boıynsha jáne asyraýshysynan aıyrylý jaǵdaıy boıynsha zeınetkerlik jasqa tolǵan memlekettik áleýmettik járdemaqy alýshylar;

- kópbalaly analar;

- kópbalaly otbasylar;

- múgedekter;

- on segiz jasqa deıingi múgedek balalar, onyń ishinde ata-analarynyń (zańdy ókilderiniń) biri.

- «Jappaı saıası qýǵyn-súrgin qurbandaryn aqtaý týraly» zańda belgilengen tártippen aqtalǵan, 1986 jylǵy 17-18 jeltoqsan oqıǵasyna qatysýshylar qatarynan saıası qýǵyn-súrgin qurbandary.

Jeńildikti kólik kartasyn ortalyq kassada (R. Qoshqarbaev dańǵyly, 50/1) resimdeýge nemese cts.gov.kz saıtynda onlaın ótinim berýge bolady.

Jeńildikti kartany resimdeý aldynda 109 nómiri boıynsha iKomek biryńǵaı baılanys ortalyǵyna habarlasqan jón.