Elorda avtobýstarynda qansha adam bıletsiz júretinin kórsetetin júıe ornatyldy

<p>ASTANA. KAZINFORM — Astana qalasy ákimi Jeńis Qasymbek óziniń <a href="https://www.instagram.com/p/DEsHVfms0rv/?igsh=cGE1aXJ0cnoyN29k" target="_blank" rel="noopener">Instagram</a>-daǵy paraqshasynda qoǵamdyq kóliktiń jumysy týraly jazdy</p>

Jeńis Qasymbek CTS Ortalyq dıspetcherlik qyzmetiniń keńsesine barǵan.

— CTS Ortalyq dıspetcherlik qyzmetiniń keńsesine bardym. Bul ortalyq qala boıynsha barlyq avtobýsty monıtorıngilep, baqylap otyrady: qoǵamdyq kóliktiń statýsyn, jelige qanshalyqty ýaqytynda keletinin, keptelis kezinde avtobýstardyń jumysyn retteý qajet pe, jol qozǵalysynyń qarqyndylyǵyn jáne t. b. kóredi, — dep jazdy ol.

Ákimniń sózinshe, eki jylda jelige 700-den astam jańa avtobýs shyǵaryldy.

— Sońǵy eki jylda jelige 700-den astam jańa avtobýs shyǵardyq, bul bizge qoǵamdyq kólik parkin 45% jańartýǵa múmkindik berdi. Osynyń jáne júıeni jańǵyrtý esebinen jolaýshylar aǵyny 26%-ǵa artty. Máselen, 2023 jyly jolaýshylar aǵyny kúnine orta eseppen 755 myń adamdy qurasa, 2024 jyly 950 myń adam boldy, — dep atap ótti Qasymbek.

Elorda basshysy Bus Lane engizý esebinen avtobýstardy kútý ýaqyty qysqarǵanyn, al kóliktiń ortasha jyldamdyǵy 16 km/saǵ deıin artqanyn aıtty.

— «Aqyldy baǵdarsham» engizilgen ýchaskelerde kóliktiń ortasha jyldamdyǵy 30 km/saǵ deıin ulǵaıdy. Sol sııaqty búgin avtobýstarǵa túsetin júktemeni baqylaý boıynsha pılottyq joba tanystyryldy. Jolaýshylardy baqylaýdy jaqsartý úshin júıe ár avtobýsta naqty qansha adam bıletsiz júretinin kórsetedi. Bul kóliktik baqylaý departamentiniń tıimdi jumys isteýine jáne jolaqy tóleýden jaltarǵandardy anyqtaýdy arttyrýǵa, sol arqyly olardy azaıtýǵa múmkindik beredi, — dep túsindirdi ol.

Ákimniń sózinshe, CTS bazasynda kólik basqarýdyń biryńǵaı ortalyǵynyń tujyrymdamasy tanystyryldy.

— Qazir avtobýstardyń statýsyn naqty ýaqyt rejıminde kórip otyrmyz, al endi bul jobany qalanyń kommýnaldyq qyzmetterine de engizý josparlanyp otyr: jelige qansha tazalaý jáne sýarý tehnıkasy shyqty jáne t. b. Joǵaryda aıtylǵan barlyq jumysty, onyń ishinde jol ınfraqurylymyn damytý boıynsha jumystardy bıyl da jalǵastyramyz, — dep jazdy Jeńis Qasymbek.

Buǵan deıin habarlanǵandaı, Astanadaǵy «Qazaqstan» sport kesheniniń qurylysy qashan aıaqtalatyny aıtyldy.