Astana aýmaǵyndaǵy bazarlarda eleýli ózgeris bolady
«Saýda jáne ıntegratsııa mınıstriniń tapsyrmasyn oryndaý maqsatynda 2025 jylǵa deıin bazarlardy jańǵyrtý jónindegi jol kartasyn oryndaý boıynsha jumysty úılestirip jatyrmyz. Astana qalasy aýmaǵynda jobanyń jalpy somasy 29,4 mlrd quraıtyn 3 bazar jańǵyrtýdan ótedi. Bul rette, «Shanhaı», «Altaı», «Uljan» bazarlary qamtylyp, olardy jańartý jumystary 2025 jyldyń sońyna deıin jalǵasady», - dedi N. Egemberdıev Astana qalasynyń kommýnıkatsııalar qyzmetindegi baspasóz máslıhatynda.
Sonymen qatar ol elordada 9 arnaıy bazar bar ekenin, onyń ishinde «Alash» bazary qazirgi zamanǵy saýda formatynyń nysanyna aınalǵanyn aıtty. Qalǵan 8 bazar 3-5 jyl aralyǵynda zamanaýı saýda formatyna kóshedi. Sonyń arasynda «On-Olja», «Mereke-Magnıt», «Etalon», «Sharyn», «Sapa», sondaı-aq, Kóktaldaǵy bazar qamtylady. Atap aıtqanda, «Sharyn» bazarynda eki kezeńnen turatyn jańǵyrtý jumystary uıymdastyrylady jáne ony aıaqtaý merzimi 2024 jylǵa belgilengen.
«2023 jylǵy 30 naýryzdaǵy №32162 aqparattyq júıede tirkeý qaǵıdalaryna sáıkes, saýda bazarlaryn Smart QR jobasyna qosý boıynsha aýqymdy jumys iske asyrylyp jatyr. Qazirgi kezde júıege «Astanalyq bazar» jáne «Ásem» bazarlary qosylǵan. Saýda qyzmetiniń qalǵan sýbektilerin qosý boıynsha jumys jalǵasyp jatyr. Bul joba turǵyndarǵa yńǵaıly bolýy úshin iske qosylyp jatyr. Osy oraıda bazarǵa qatysty málimettiń barlyǵy Smart QR júıesine engizilgen»,- dedi N.Egemberdıev
Munymen qosa ol Saýda jáne tutynýshylardyń quqyqtaryn qorǵaý departamenti Astana qalasynyń ákimdigimen birlesip, áleýmettik mańyzy bar azyq-túlik taýarlaryna 15% saýda ústemesinen asyrýǵa jol bermeý baǵytynda baǵany retteý is-sharalaryn turaqty túrde ótkizetinin aıtty. Sáýir aıynan bastap saýda ústemesine qatysty talaptardy oryndamaýdyń 23 faktisi anyqtaldy. Olar boıynsha ákimshilik is qozǵalyp, «eskertý» túrindegi jaýapkershilikke tartyldy.