Astana aýmaǵynda jańa aýdan qurylmaq

ASTANA. QazAqparat – Astana aýmaǵynda taǵy bir aýdan qurylýy múmkin. Bul týraly «Ashyq» NQA portalynda jarııalanǵan elorda ákimdiginiń qaýlysy jáne máslıhat sheshiminde kórsetilgen, dep habarlaıdy QazAqparat tilshisi.

«Qazaqstan Respýblıkasynyń ákimshilik-aýmaqtyq qurylysy týraly» Zańynyń 13-baby 3-tarmaqshasyna sáıkes Astana qalasynyń ákimdigi máslıhat sheshimin negizge ala otyryp kelesini qaýly etedi:

«Astana qalasynda jańa aýdan qurylsyn.

Astana qalasynyń «Almaty», «Baıqońyr», «Esil», «Saryarqa» aýdandarynyń jáne jańa aýdannyń shekaralary osy birlesken qaýlyǵa jáne sheshimge qosymshaǵa sáıkes belgilensin.

Osy birlesken Astana qalasy ákimdiginiń qaýlysy jáne máslıhatynyń sheshimi onyń alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi».

Qujat jobasyna sáıkes, jańa aýdannyń shekarasy 19 336 gektrady quraıdy. Ol qalanyń batys bóligindegi Esil ózeniniń boıymen shyǵysqa qaraı Qabanbaı batyr dańǵylyna deıin, odan ári Qabanbaı batyr dańǵylynyń taq sandar jaǵymen jáne Qarqaraly tas jolynyń batys jaǵymen qalanyń ońtústik shekarasyna deıin aýmaqty qamtıdy.

Jańa aýdanǵa qandaı ataý beriletini ázirge belgisiz. Eger atalǵan usynys resmı bekitilse, onda Astanada 5 ákimshilik-aýmaq paıda bolady.

Elorda ákimdiginiń qaýlysy men maslıhattyń sheshimin ashyq talqylaý 7 jeltoqsanǵa deıin jalǵasady.