Astana áýejaıynyń ushý-qoný jolaǵyn jóndeý jumystary aıaqtalýǵa jaqyn
Jóndeý jumystary 15 shildede bastalyp, 8 tamyzda aıaqtaý josparlanǵan. Oǵan 30-dan astam jumysshy jumyldyryldy. Ushý-qoný jolaǵynyń 3 myńnan astam sharshy metrine ystyq asfalt-beton qospasy quıyldy. Sondaı-aq, jolaqtaǵy tańbalaý jumystarynyń teń jartysy aıaqtaldy.
Ushý-qoný jolaǵyn jóndeý kezinde jaryqtandyrý qurylǵylaryn aýystyrý da josparlanǵan. Qoný aımaǵyndaǵy 23 dana tereńdik shamdary men ortalyq syzyq shamdary aýystyryldy.
Jóndeý jumystaryna baılanysty saǵat 11:00 men 18:00 aralyǵynda ushý-qoný jolaǵy jabyq. Osyǵan oraı, ishki jáne halyqaralyq reıster kestesine ózgeris endi. Degenmen, reısterdiń oryndalýyna esh kedirgi keltirilgen joq. Jóndeý jumystary bastalǵaly 685 ishki jáne 385 halyqaralyq reıs oryndaldy.
«Jolaýshylardyń qaýipsiz ushýy men qonýyn qamtamasyz etý maqsatynda bastalǵan aǵymdaǵy jóndeý jumysy sapaly júrip jatyr. Jóndeýdiń ýaqtyly aıaqtalýy bizdiń jiti baqylaýymyzda. Astana halyqaralyq áýejaıy – tek elimizdegi emes, Ortalyq Azııadaǵy eń iri áýejaılardyń biri. Sondyqtan, munda ishki jáne halyqaralyq reısterdiń sany kóp. Tıisinshe ushý-qoný jolaǵy da ýaqtyly jóndeýdi qajet etedi», - deıdi «Astana halyqaralyq áýejaıy» AQ basqarma tóraǵasy Erǵazy Joldasov.