Astana áýejaıynda terrorǵa qarsy oqý-jattyǵý ótip jatyr
10:02, 14 Qyrkúıek 2018
ASTANA. QazAqparat - Búgin 9.00-den 13.00-ge deıin Nursultan Nazarbaev atyndaǵy Halyqaralyq áýejaıdyń aýmaǵynda josparly túrde antıterrorlyq oqý-jattyǵýlar ótkiziledi, dep habarlaıdy QazAqparat Astana qalalyq ІІD baspasóz qyzmetine silteme jasap.
Terrorızge qarsy astanalyq jedel shtab áýejaı qyzmetteri jáne «Air Astana» AQ-men birlesip oqý-jattyǵý ótkizip jatyr. Jattyǵýdyń maqsaty - vedomstvoaralyq yntymaqtastyqty jetildirý jáne kólik nysandaryndaǵy lańkestik áreketterdi jedel anyqtaý úshin áýejaı men Astanalyq jedel shtabtyń kúshin biriktirý.
Oqý-jattyǵýlar túrli nusqany qarastyrady, ári shynaıy jaǵdaıǵa barynsha jaqyndatylǵan.
Sharany ótkizý barysynda áýejaı mańynda shekteý sharalary júrgiziledi.
Osyǵan baılanysty, AJSh áýejaı qonaqtaryna oqý-jattyǵýǵa túsinistikpen qarap, qaýipsizdik sharalaryn saqtaýǵa jáne memlekettik organdardyń zańdy talaptaryn oryndaýǵa shaqyrdy.