Astana áýejaıynda alǵash ret elektrondy otyrǵyzý talony engizildi

ASTANA. QazAqparat - Nursultan Nazarbaev halyqaralyq áýejaıynyń T1 jáne T2 termınaldarynda «ePassenger» baǵdarlamasy iske qosyldy. Jańa júıe mobıldi otyrǵyzý talonyn qoldanatyn jolaýshylarǵa qyzmet kórsetýge arnalǵan, dep habarlaıdy QazAqparat tilshisi.

QR IIDM Azamattyq avıatsııa komıtetiniń Feısbýktegi paraqshasynda jarııa etilgen málimetke sáıkes, atalǵan tehnologııa qazirde álemniń iri áýejaılarynda qoldanysqa engizilgen. Qyzmet kórsetý júıesine sáıkes, elektrondy otyrǵyzý talony bar jolaýshylar osy qujat boıynsha ushý aldyndaǵy tekserýden ótedi. Endi jolaýshylardyń elektrondy tasymaldaýshy qural ekranyndaǵy otyrǵyzý talonyn skanerleý arqyly tekserýden ótý múmkindigi bar. Bul smartfon nemese planshet bolýy múmkin. Qaǵaz kóshirmesi qajet emes.

«Bul jaǵdaıda qol júgi bar jolaýshy ushaq reıisine kompıýter nemese mobıldi qurylǵy arqyly tirkelip, al arnaıy 2D barkody bar otyrǵyzý talony jolaýshyǵa elektrondy pochta arqyly jiberiledi», - dep atap ótedi komıtetten.

Esterińizge sala keteıik, budan buryn reıske tirkelý kezinde jolaýshy otyrǵyzý talonyn alyp, onymen sterıldik aımaqqa kirerde arnaıy tekserýden ótip, ushaqqa osy talonyn kórsetkennen keıin otyratyn. Bul rette jolaýshy otyrǵyzý talonyn ózi basyp shyǵaryp nemese ony áýe kompanııasynyń tirkeý ornynan alatyn. Osylaısha, elorda áýejaıyndaǵy atalǵan qyzmet kórsetý protsesi jolaýshylardyń reıske tirkelýin aıtarlyqtaı jeńildetip, ýaqyttaryn únemdeıdi.