Astana áýejaıyna AQSh-tyń áskerı ushaǵy qondy – SІM sebebin aıtty

NUR-SULTAN. QazAqparat – QR Syrtqy ister mınıstrligi Amerıka Qurama Shtattarynyń áskerı ushaǵynyń elorda áýejaıyna qoný sebebin aıtty, dep habarlaıdy QazAqparat tilshisi.

Kúni keshe buqaralyq aqparat quraldarynda elorda áýejaıyna AQSh Áskerı-áýe kúshterine tıesili Boeing C-17A ushaǵynyń qonǵany týraly aqparat taraǵan bolatyn.

«Bul ushaq amerıkalyq tarappen aradaǵy ýaǵdalastyq boıynsha ushyp keldi. Ol Amerıka Elshiligine dıplomatııalyq júk ákeldi. Mundaı tájirıbe bar. Dıplomatııalyq júk tasymaldaıtyn barlyq ushaq AQSh Áskerı-áýe kúshterine tıesili. Sondyqtan olar áskerı ushaqtar. Kóptegen adamda nelikten ol áskerı degen suraq týyndaıdy. Buǵan deıin ol óńirlerge, birqatar elge poshta jetkizgen. Ushaq bir jarym saǵattaı turdy. Júgin túsirip, ushyp ketti», - dep túsindirdi mınıstrliktiń resmı ókili Aıbek Smadııarov vedomstvonyń baspasóz qyzmeti alańynda ótken brıfıngide.