Astana áýejaıy aýa raıy jaǵdaıyna qaramastan ushaqtardy qabyldaýǵa qaýqarly bolady

ASTANA. QazAqparat - Astana áýejaıynda jańa termınal iske qosylǵannan keıin jolaýshylar aǵymyn jylyna 7 mıllıonǵa jetkizýge bolady. Bul týraly búgin Ortalyq kommýnıkatsııalar qyzmetindegi baspasóz máslıhatynda «QTJ» AQ fılıaly - Kóliktik logıstıkalyq damý ortalyǵy» dırektorynyń orynbasary Abdýr-Rashıd Sákenov málim etti.

Taıaýda Astana áýejaıynda ushý-qoný alańyn qaıta jaraqtandyrý men jańa termınal qurylysyn júzege asyrý josparlanyp otyrǵanynyna toqtalǵan ol: «Bul jobanyń aıaqtalý merzimi 2017 jyldyń naýryzyna belgilenip otyr. 2015 jyly temir quımalardyń basty qańqalary ornatylady. Qazirgi kezde daıyndyq jumystary júrip jatyr. Bul jobanyń basty maqsaty - áýejaıdan ótetin jolaýshylardyń sanyn saǵatyna 750 adamnan 2,500-ge deıin arttyrý. Saparlaıtyn adamdardyń sanyn jylyna 3,5 mıllıonnan 7 mıllıonǵa deıin jetkizý kózdelip otyr», - dedi. Sákenovtyń sózine qaraǵanda, bul joba iske qosylǵannan keıin 400 adamǵa jumys orny ashylady. Qurylys kezinde 1 myńnan astam jumysshy tartylady. «2016 jyly termınaldyń ishki jáne syrtqy jumystary aıaqtalady. Odan basqa ushý-qoný alańy qazirgi zamanǵy talaptarǵa sáıkes joǵary standarttarmen salynady. Osy oraıda áýejaı aýa raıy jaǵdaıyna qaramastan, ushaqtardy qabyldaýǵa qaýqarly bolady», - dep túıindedi ol.