Astana áýejaıynyń ushý-qoný jolaǵy qashan jóndeletini aıtyldy

<p>ASTANA. KAZINFORM - Áleýmettik jelilerdegi jeke paraqshalarda Astana halyqaralyq áýejaıynyń ushý-qoný jolaǵynda kúrdeli jóndeý bolmaıtyndyǵy týraly aqparat tarady. Elorda áýejaıy bul aqparattyń shyndyqqa janaspaıtynyn habarlaıdy.</p>

«1 mamyrdan bastap Astana qalasynyń áýejaıynda („Mabetex Group“) bas merdigermen birlesip ushý-qoný jolaǵynda kúrdeli jóndeý jumystaryn júrgizý boıynsha is-sharalar bastaldy. 

Asfaltbeton jumystaryn júrgizý úshin bas merdiger Astana, Aqtóbe, Shymkent, Qyzylorda, Taraz, Taldyqorǵan, Oral jáne Petropavl qalalarynyń áýejaılarynda áýeaılaq jabyndaryn qaıta jańartýda tájirıbesi bar «K-Dorstroı» AQ kompanııasyn jumysqa tartty. 

Búgingi tańda obektide ınjenerlik-geodezııalyq izdenister jalǵasýda, sonymen qatar arnaıy tehnıka tartylyp, ınertti materıaldar jetkizilýde», — dep jazdy kompanııadan.

Osyǵan baılanysty Astana halyqaralyq áýejaıyndaǵy avıareıster keshki 10-nan tańǵy 6-ǵa deıin oryndalmaıdy.

«Qazaeronavıgatsııa» RMK arqyly kúrdeli jóndeýge baılanysty áýeaılaqta engiziletin shekteýler týraly NOTAM elektrondy habarlamalary jiberildi. Bul rette jalpy sheshimge qol jetkizýde qoldaý kórsetkeni úshin avıakompanııalarǵa alǵysymyzdy bildiremiz.

Áýejaıdyń qoldanystaǵy ushý-qoný jolaǵy 20 jyldan astam ýaqyt buryn paıdalanýǵa berilgenin jáne ushý-qoný jolaǵyna kúrdeli jóndeý júrgizý senimgerlik basqarý kezeńinde ınvestordyń birinshi kezektegi mindeti bolǵanyn atap ótken jón.

Áýejaı ákimshiligi árbir jolaýshy men otbasynyń saıahatyn qaýipsiz ári jaıly etýdi jalǵastyrýda», — dep jazdy áýejaıdyń baspasóz qyzmetinen.

Reıster kestesiniń ózgerýine baılanysty osy ýaqytta jolaýshylar aǵyny 2 esege ulǵaıady. Sondaı-aq, elorda áýejaıy jolaýshylarynyń qaýipsizdigi men jaılylyǵyn qamtamasyz etý úshin ushý aldyndaǵy tekserý aımaqtaryn ulǵaıtty. Bul rette ushý aldyndaǵy tekserýde shamadan tys jolaýshylar aǵyny jáne vokzal mańyndaǵy turaqta kólik sany ulǵaıýy múmkin. Osyǵan baılanysty áýejaı ákimshiligi jolaýshylardan reısterdi sátti oryndaý maqsatynda áýejaıǵa 3-4 saǵatqa erte kelýin suraıdy.

Sonymen qatar, jabyq turaqqa qarama-qarsy ornalasqan 300 kólikke arnalǵan áýejaıdyń tegin turaǵy bar ekenin eske salamyz. Sondaı-aq, áýejaı ákimshiligi erekshe qajettilikteri bar jolaýshylar úshin birinshi qatarda tegin arnaıy turaq oryndary jáne PRM agentteriniń qyzmetteri bar ekenin habarlaıdy.

Áýejaı basshylyǵy áýejaı aýmaǵynda jáne termınaldarda jolaýshylardy táýlik boıy aqparattyq qoldaý úshin personaldy taǵaıyndady.

Qazirgi ýaqytta áýejaı jolaýshylardy qabyldaý qajettilikteri men múmkindikterin anyqtaý maqsatynda aldaǵy 30 jylǵa arnalǵan Bas jospardy qaıta qaraýda. Bul ózgerister Astana áýejaıynda bıometrııalyq derekter men tehnologııalardy keńinen qoldanýdy, júk tasymaldaýdyń jańa strategııasyn ázirleýdi jáne áýejaıdy arnaıy ekonomıkalyq aımaq qura otyryp, óz sanatyndaǵy álemdegi eń úzdik 10 áýejaıdyń qataryna qosýǵa baǵyttalǵan zertteýlerdi qamtıdy.