Astana áýejaıynda ushaqtardyń zaqymdanýy: áýe kemeleri qanshalyqty qaýipsiz

<p>ASTANA. KAZINFORM &ndash; Keıingi kezderi Astana áýejaıynda ushaqtardy zaqymdanýy oqıǵalary jıilep ketti. Qazir osy ushaqtarmen saparlaý qanshalyqty qaýipsiz? Bul suraqqa QR Kólik mınıstrliginde ótken brıfıngide áýe kompanııalarynyń ókilderi jaýap berdi.</p>

Eske salsaq, 1 tamyzda SCAT kompanııasy Boeing 737 ushaǵynyń fıýzelıajyna zaqym keldi, sonyń saldarynan áýe kompanııasy 20 reıstiń kestesin ózgertýge májbúr boldy. 8 tamyzda tasymaldaýshynyń taǵy bir ushaǵy daýyl men burshaqtan zaqymdanǵan. 

SCAT áýe kompanııasynyń kommertsııalyq dırektory Nıkolaı Býrıakov bir ushaq 3 kún, al ekinshisi 10 kún boıy turyp qalǵanyn aıtty.

«Qazir ushaqtardyń barlyǵy jóndeldi. Olar jolaýshylar tasymaldaýda qaýipsiz dep aıta alamyz. Ushaqtarǵa jańa bólshekter salyndy. Qazir olar áýe reısterin oryndap jatyr», - dedi ol. 

 

Sonymen qatar, 5 tamyz kúni Astana áýejaıynyń operatory FlyArystan ushaqtarynyń birinen aqaý shyǵyp, saldarynan ushaqtyń birneshe kún boıy májbúrli turaqqa qoıylǵanyn habarlady. Áýejaı baspaldaqtaryn durys qoldanbaýdyń saldarynan ushaqtyń artqy kireberis esigi zaqymdanǵany belgili boldy. 

Keıinnen Air Astana áýekompanııasy tórt ushaqtyń zaqymdanǵanyn, reıster keshigetinin málimdedi. 

Bul rette, Air Astana kompanııasynyń vıtse-prezıdenti Aleksandr Neboga áýe saparyna shyǵatyn barlyq ushaq tehnıkalyq tekserýden ótkenin atap ótti.

«Tehnıkalyq turǵyda kemshiligi bar eshbir ushaq ushpaıdy. Sondyqtan burshaq saldarynan zaqymdalǵan ushaqtar qalpyna keltirildi, barlyǵy áýe reısterin oryndap jatyr. Keıbireýleri 2 kún, al qalǵandary 4 kún jóndeldi. Osynyń ózinde keıbir qıyndyqtar boldy, ıaǵnı reıster keshikti. Atap aıtqanda, qaýipsizdik máselesin birinshi orynǵa qoıyp otyrmyz», - dedi kompanııa ókili. 

Budan buryn habarlanǵandaı, QR Kólik vıtse-mınıstri Talǵat Lastaev jaz aılarynda reısterdiń keshigýi derekterine qatysty túsinik berdi.